Sańnikaŭ asudžany na 5 hadoŭ kałonii

14 maja ŭ sudzie Partyzanskaha rajona Minska byŭ abvieščany prysud eks-kandydatu ŭ prezidenty Andreju Sańnikavu i čatyrom šarahovym udzielnikam akcyi. Sudździa Natalla Čaćviartkova zasudziła za ŭdzieł i kiravańnie «masavymi biesparadkami» eks-kandydata ŭ prezidenty Andreja Sańnikava na 5 hadoŭ kałonii ŭzmocnienaha režymu (prakuror Anton Zaharoŭski prasiŭ siem hadoŭ).

Aleh Hniedčyk za ŭdzieł u «masavych biesparadkach» asudžany na 3,5 hoda, Ilja Vasilevič, Fiodar Mirzajanaŭ, Uładzimir Jaromienak — na try hady kałonii ŭzmocnienaha režymu. Usie jany abvinavačvalisia pavodle artykuła «masavyja biesparadki» (maksimalny termin — da 15 hadoŭ)

Dziaržabvinavaŭca paličyŭ vinu usich padsudnych dakazanaj. Usie, aprača Sańnikava, aktyŭna ŭdzielničali ŭ pahromach, akazvali supraciŭ milicyi. Sańnikaŭ, pavodle Zaharoŭskaha, arhanizavaŭ masavyja biesparadki, uznačaliŭ ich, zahadzia spłanavaŭ i padrychtavaŭ pravakacyi. Jon zaklikaŭ ludziej prarvacca ŭ Dom urada, pravakujučy natoŭp, i dvojčy padychodziŭ da dźviarej budynka, zajaviŭ prakuror.

Na abviaščeńnie prysudu siońnia pryjšoŭ śviet narodu: svajaki, znajomyja, pradstaŭniki dypłamatyčnych pradstaŭnictvaŭ. Usie nie źmiaścilisia ŭ zale, raźličanaj na 70–80 čałaviek. Maci Fiodara Mirzajanava nie puścili na abviaščeńnie prysudu, jana sprabavała prabicca ŭ zału suda: «Puścicie mianie da syna!». Jaje tak i nie puścili.

Andrej Sańnikaŭ paśla abviaščeńnia prysudu paśpieŭ kryknuć: «Bieražycie maju siamju!».

Darečy, 15 maja synu Andreja Sańnikava i Irynie Chalip spoŭnicca 4 hady.

Adnahrupniki Fiodara Mirzajanava vyhuknuli: «Fiedzia, my z taboj!». Ludzi, šakavanyja prysudam, kryčali: «Hańba!»

Ciaham 10 dzion možna padać kasacyjnuju skarhu, advakaty Sańnikava Varvaševič i Kavaleŭskaja paśla abviaščeńnia prysudu zajavili, što ličać jaho niezakonnym:

«Nie było pryviedziena nivodnaha dokazu», -- zajavili jany.

Cieść A. Sańnikava Uładzimir Chalip vystupiŭ z dosyć rezkaj zajavaj: «Jany dumajuć, što Sańnikaŭ budzie siadzieć 5 hadoŭ, ale jon i blizka nie budzie siadzieć stolki. Jon budzie vyzvaleny narodam,

a toj, chto pasadziŭ u turmu, chutka sam apyniecca na łavie padsudnych».

Maci Fiodara Mirzajanava sp-nia Ludmiła padziakavała adnahrupnikam syna, što pryjšli padtrymać jaho tavaryša, a taksama svaim kaleham-psichołaham, jakija padtrymlivali jaje, i Andreju Sańnikavu za padtrymku syna.

«Raniej ja była apalityčnaj asobaj, ale zaraz ja abaviazkova pajdu na Płošču», -- skazała jana.

Darečy padčas abviaščeńnia vyraku sudździa čytała całkam tekst prysudu, ale praz hadzinu 15 chvilin Andrej Sańnikaŭ umiašaŭsia i paprasiŭ pračytać tolki vynikovuju častku, zaznačyŭšy, što ŭ zale suda prysutničaje jaho staraja maci.

* * *

Takim čynam, pa stanie na viečar 14 traŭnia za ŭdzieł u Płoščy (padziei 19 śniežnia i padziei, što papiaredničali im) asudžanyja 27 čałaviek:

za ŭdzieł u masavych biesparadkach, aproč A.Sańnikava, A.Hniedčyka, F.Mirzajanava, I.Vasileviča, U.Jaromienka,

Vasil Parfiankoŭ pryhavorany da čatyroch hadoŭ pazbaŭleńnia voli ŭ kałonii strohaha režymu; Alaksandr Atroščankaŭ — da čatyroch hadoŭ u kałonii ŭzmocnienaha režymu; Mikita Lichavid — da troch z pałovaj hadoŭ pazbaŭleńnia voli, Dźmitryj Novik i Alaksandr Małčanaŭ — da troch z pałovaj i troch hadoŭ u kałonii ŭzmocnienaha režymu adpaviedna; hramadzianie RF Arciom Breus i Ivan Haponaŭ — da štrafu ŭ 300 bazavych vieličyniaŭ (10,5 młn. rubloŭ) kožny; Dźmitryj Miadźviedź — da troch hadoŭ abmiežavańnia voli biez nakiravańnia ŭ papraŭčuju ŭstanovu. Aleś Kirkievič asudžany na 4 hady źniavoleńnia, Pavieł Vinahradaŭ — na 4 hady, Andrej Pratasienia — 3 hady, Źmicier Drozd — na 3 hady, Uładzimir Chamičenka — 3 hady.

Uładzimir Łoban asudžany da 3 hod pazbaŭleńnia voli, Andrej Fiedarkievič — da 3,5, Jaŭhien Sakret — da 3, Siarhiej Kazakoŭ — da 3, Dźmitryj Daronin — da 3,5 hadoŭ u kałonii ahulnaha režymu, Vital Macukievič — da 3 hadoŭ kałonii stroha režymu.

Za padrychtoŭku dziejańniaŭ, što parušajuć hramadski paradak (art. 342), na 2 hady kałonii ahulnaha režymu byŭ asudžany kaardynatar «Jeŭrapiejskaj Biełarusi» Źmicier Bandarenka.

Aproč taho, za złosnaje chulihanstva byli taksama asudžanyja Źmicier Daškievič i Eduard Łobaŭ — na dva i čatyry hady pazbaŭleńnia voli adpaviedna. Ich zatrymali 18 śniežnia, za dzień da prezidenckich vybaraŭ.

* * *

U paniadziełak, 16 maja, budzie vyniesieny prysud kiraŭniku štaba Vitala Rymašeŭskaha Paŭłu Sieviaryncu (prakuror zapatrabavaŭ asudzić jaho try hady chimii), žurnalistcy, žoncy Andreja Sańnikava Irynie Chalip (dva hady abmiežavańnia voli z adterminoŭkaj), kiraŭnika štaba Mikoły Statkieviča Siarhieju Marcalevu. (dva hady abmiežavańnia voli z adterminoŭkaj).

U Minsku praciahvajucca dva sudovyja palityčnyja pracesy:

nad eks-kandydatami ŭ prezidenty Mikołam Statkievičam i Dźmitryjem Usam, a taksama šarahovymi ŭdzielnikami akcyi Andrejem Paźniakom, Alaksandram Kłaskoŭskim-małodšym, Alaksandram Kviatkievičam, Arciomam Hrybkovym, Dźmitryjem Bułanavym. Im pahražaje da 15 hadoŭ źniavoleńnia

nad eks-kandydatami ŭ prezidenty Uładzimiram Niaklajevym i Vitalom Rymašeŭskim, čalcami vybarčaha štaba Niaklajeva — Andrejem Dźmitryjevym (kiraŭnik štaba), Alaksandram Fiadutam (palittechnołah), Siarhiejem Vaźniakom, a taksama hramadskaj aktyvistkaj Nastaj Pałažankaj. Im pahražaje da troch hadoŭ źniavoleńnia.

• 0
• 0
• 0
• 0
• 0
• 0
• 0
• 0