Kłoŭn ci pasiarednik?

Navošta Silvia Berluskoni jedzie ŭ Miensk? Kali b Eŭraźviaz vyrašyŭ nakiravać na pieramovy z Łukašenkam upaŭnavažanaha ŭsimi aficyjnaha emisara, to peŭna abraŭ by na hetuju rolu mienš ekzatyčnuju postać.

Palityk, jaki z pryčyny pajezdki nia pryjdzie na sudovyja pracesy pa abvinavačvańni ŭ seksie ź niepaŭnahadovaj i ŭ karupcyi — miakka kažučy, nia samy lepšy pradstaŭnik Eŭropy. Darečy, niadaŭna Wikileaks abnarodavaŭ dakument Dziarždepartamentu, u jakim amerykanskaje dyplamatyčnaje viedamstva vykazvała razdražnieńnie niedarečnymi sprobami sinjora Silvia pasiaredničać u roznych mižnarodnych spravach, bo jon svaimi eskapadami psuje palityku nia tolki Złučanym Štatam, ale i Eŭropie. I ŭ jakaści adnaho sa šmatlikich prykładaŭ hetaha pryvodzilisia jakraz inicyjatyvy italjanskaha premjera adnosna Biełarusi.

Tak što razmova idzie chutčej za ŭsio pra adnu z takich inicyjatyvaŭ.

Praŭda, hetym razam u sp-ra Berluskoni jość spryjalnaja hleba dla mocnaha palityčnaha chodu. Bo ciapierašni pat u stasunkach Eŭraźviazu ź Biełaruśsiu nasamreč niavyhadny nivodnamu z bakoŭ. Siońniašniaje rašeńnie Eŭraźviazu, jaki, nasupierak abvieščanym papiarednie planam, nia ŭvioŭ ekanamičnych sankcyjaŭ adnosna Biełarusi, śviedčyć mienavita pra toje, što EZ zusim nie zacikaŭleny ŭ eskalacyi kanfliktu i chacieŭ by jaho chutčej vyrašyć.

Ale jość publična ahučanaja cana spynieńnia kanfliktu — vyzvaleńnie palitviaźniaŭ u Biełarusi.

Eŭraźviazu admovicca zaraz ad hetaj umovy — heta zhubić tvar.

Ale pa vialikim rachunku strata tvaru — heta adziny čyńnik, jaki strymlivaje Łukašenku ad taho, kab vykanać hetuju ŭmovu. Handal viaźniami — biznes vyhadny, ale ź inšaj epochi. Nichto zaraz z Łukašenkam u hetuju hulniu hulać nia budzie.

Treba vyzvalać usich. I ŭsiaho tolki patrebny niechta, chto «pa-čałaviečy» paprosić ab hetym.

I sp-r Berluskoni ŭ hetym sensie postać nadzvyčaj udałaja. Niechta ličyć jaho kłoŭnam, niechta — enfant terrible eŭrapiejskaj palityki, ale farmalna — lider adnoj ź viadučych eŭrapiejskich krain.

Pajści nasustrač prośbie takoha pavažanaha čałavieka jak by i nia soramna.

Tym samym Berluskoni zrobić dobruju pasłuhu i Łukašenku, i Eŭropie, jakaja biez zadavalnieńnia naziraje za tym, jak Rasieja ŭ stasunkach ź Biełaruśsiu źbiraje bonusy ad svajho manapolnaha stanovišča partnera Miensku.

Ci kansultavaŭsia italjanski premjer nakont vizytu ŭ Miensk sa svaimi eŭrapiejskimi partnerami? Chutčej za ŭsio tak, pastaviŭ ich u viadomaść, ale naŭrad ci jany dali jamu na heta mandat. Skazali chutčej za ŭsio: «Atrymajecca ŭ ciabie, Silvia, budzieš małajčyna. Nu, a nie — dyk jak byŭ enfant terrible, tak im i zastanieśsia».

• 0
• 0
• 0
• 0
• 0
• 0
• 0
• 0