Ukrainskaja hazieta: pieršym vysłaŭ biełarusaŭ za špijanaž Kijeŭ

Aŭtarytetny ŭkrainski štotydniovik "Zierkało niedieli" ŭ čarhovym numary pradoŭžyŭ rasśledavańnie dypłamatyčnaha skandała pamiž Minskam i Kijevam.

Jak paviedamlałasia raniej, pavodle infarmacyi krynicaŭ vydańnia ŭ Kabiniecie ministraŭ Ukrainy, u červieni adbyłasia vysyłka dvuch supracoŭnikaŭ pasolstva Ukrainy ŭ Biełarusi — ataše pa pytańniach abarony i vajennaha ataše. U adkaz Ukraina vysłała vajennaha ataše Biełarusi Andreja Kajuka.

Zhodna z adnoj ź viersij, vysyłkaj dypłamataŭ Minsk adreahavaŭ na adkaz prezidenta Ukrainy Viktara Janukoviča na abvinavačańni Alaksandra Łukašenki ŭ "vašyvaści". Ukrainski prezident vyrašyŭ pieradać adkaz praz premjera Mikałaja Azarava, jaki 19 maja znachodziŭsia ŭ Minsku. "Sutnaść adkazu nieviadomaja. Ale jon vyklikaŭ niehatyŭnuju reakcyju biełaruskaha prezidenta i pryvioŭ da vysyłki ŭkrainskich dypłamataŭ", — paviedamlaje vydańnie, zaznačajučy, što "na fakcie vysyłki vajennych dypłamataŭ nie akcentavali ŭvahu ni biełaruski, ni ŭkrainski baki".

Rezkija vykazvańni ŭ adras kiraŭnictva Ukrainy i ES Łukašenka zrabiŭ 26 krasavika padčas naviedvańnia Naroŭli (Homielskaja vobłaść). U pryvatnaści, na pytańnie, čamu jon nie prysutničaŭ va Ukrainie na mierapryjemstvach, pryśviečanych 25-hodździu avaryi na ČAES, Łukašenka paraiŭ źviarnucca pa adkaz da Viktara Janukoviča: "Vy zadajcie hetaje pytańnie Janukoviču — čamu biełaruski prezident nie prysutničaje na ich mierapryjemstvach. — Heta vy ŭ ich spytajcie. Na žal, vašyvaści chapaje ŭ ciapierašniaha kiraŭnictva Ukrainy. Naprošvacca ja ni da kaho nie źbirajusia. I być niejkim padpiavałam ja taksama nie źbirajusia ni ŭ adnaho prezidenta, ni ŭ druhoha".

Aficyjnyja asoby skandał praktyčna nie kamientujuć, a biełaruski bok admaŭlaje fakt vysyłki Kajuka.

Pavodle infarmacyi "Zierkała niedieli", pryčyna vysyłki ŭkrainskich dypłamataŭ "bolš prazrystaja, ale nie mienš skandalnaja". "Na praciahu apošnich čatyroch miesiacaŭ z Ukrainy za špijanaž byli vysłanyja dva vajennyja ataše Respubliki Biełaruś. Charakterna, što pamiž śpiecsłužbami krain SND isnuje damoŭlenaść nie vieści raźviedvalnuju dziejnaść adzin suprać druhoha. Ale Minsk (zrešty, jak i Maskva) nie prytrymlivajecca hetaha pahadnieńnia. Naprykład, karystajučysia tym, što asobnyja nieśviadomyja ŭkrainskija hramadzianie časta pravozili cieraz ukrainska-biełaruskuju miažu niezadekłaravanyja błoki cyharet, biełarusy aktyŭna vierbavali ŭkraincaŭ. Adnosna hetaha ŭkrainskaje MZS nie raz biezvynikova pieradavaŭ noty biełaruskamu boku", — piša vydańnie.

"Paśla rašeńnia Kijeva mieła miesca reakcyja biełaruskich uładaŭ u adkaz: ź Minska byli vysłany dva ŭkrainskija vajennyja dypłamaty — ataše pa pytańniach abarony i vajenny ataše, — paviedamlaje štotydniovik. — U śviecie dypłamatyi dziejničaje pryncyp uzajemnaści. Ale biełarusy vyjšli za miežy praviłaŭ, pryniatych u cyvilizavanym śviecie. Minsku padałosia mała abviaścić niepažadanymi piersonami ŭkrainskich vajennych dypłamataŭ. Biełaruskaj kontrraźviedkaj byŭ razyhrany "śpiektakl", jaki pavinien byŭ dyskredytavać ukrainskich aficeraŭ. I ŭ kancy maja apošni supracoŭnik vajennaha ataše pasolstva Ukrainy byŭ vymušany na praciahu 24 hadzin pakinuć terytoryju Respubliki Biełaruś".

Na dumkuju haziety, miarkujučy pa pavodzinach Minska i Kijeva, niahledziačy na dziejańni biełaruskaj kontrraźviedki, špijonskaja historyja nie budzie mieć surjoznych nastupstvaŭ. "Baki, niahledziačy na isnujučyja prablemy, nie chočuć uzmacniać kanflikt. Bo publičnyja špijonskija skandały nie prachodziać biasśledna dla dvuchbakovych adnosinaŭ… Kijeŭ i Minsk chočuć zachavać mahčymaść dyjałohu. Dla bakoŭ jon ujaŭlajecca tym bolš važnym, kali ŭličyć ciažkuju situacyju, u jakoj apynułasia Biełaruś i toje, što ad novaha ŭkrainska-biełaruskaha kanfliktu vyjhraje tolki Kreml", — miarkuje vydańnie.

• 0
• 0
• 0
• 0
• 0
• 0
• 0
• 0