Źmitra Bandarenku trymali ŭ turemnym karcary na łancuhu

22 lipienia žonka kaardynatara hramadzianskaj kampanii «Jeŭrapiejskaja Biełaruś» Volha Bandarenka znoŭ zmahła sustrecca z mužam u śledčym izalatary MUS.

Padčas spatkańnia stała viadoma, što ŭ paniadziełak, 25 lipienia, Źmiciera Bandarenku pavinny pieravieści z Respublikanskaj turemnaj lakarni ŭ 5-ju kliniku Minska. U aŭtorak palitviaźniu, u jakoha zapaleńnie kiły mižpazvanočnaj dyska, zaščymleńnie śpinnych niervaŭ, parez adnoj nahi i pahroza paraliču druhoj, pavinny zrabić apieracyju.

Nahadajem, što administracyja SIZA MUS ultymatyŭna zajaviła, što palitviazień pavinien abo adpraŭlacca ŭ kałoniju, abo kłaścisia na apieracyju. U kansultacyi niejrachirurha jamu admoŭlena.

«Napiaredadni ja była ŭ niezaležnaha chirurha i jon skazaŭ, što biez naležnaha adnaŭleńnia apieracyju pravodzić niebiaśpiečna. Siońnia ž Dzima paviedamiŭ, što ŭ paniadziełak jaho pavinny advieźci ŭ lakarniu, a ŭ aŭtorak zrabić apieracyju.

Ale ŭsie jaho lekary, u tym liku i miedyki z turemnaj lakarni, vystupajuć suprać apieracyi, pakolki ŭ jaho jość fizijałahičnyja supraćpakazańni i apieracyju pravodzić niebiaśpiečna — vialikaja ryzyka nabyćcia invalidnaści», — paviedamiła Volha Bandarenka.

Pa słovach žonki palitviaźnia, praktyčna vykanać paślaapieracyjnyja rekamiendacyi — tolki lažać abo tolki stajać — u turmie niemahčyma. Reabilitacyja pavinna prachodzić nie mienš za miesiac.

«A mnie lekar pry sustrečy skazała, što ŭ balnicy Dzima budzie lažać čatyry dni i 2 tydni ŭ turemnym špitali na Vaładarskaha. Paśla apieracyi jaho čakajuć mocnyja boli i chutčej za ŭsio jamu buduć kazać: nie napišaš list ab pamiłavańni — nie damo abiazbolvajučych lekaŭ», — aścierahajecca Volha Bandarenka.

Siońnia stali viadomyja i žachlivyja padrabiaznaści znachodžańnia Źmitra Bandarenka ŭ śledčym izalatary KDB. Nahadajem, što raniej Bandarenka, prablemy sa zdaroŭjem ŭ jakoha paŭstali paśla šmatlikich źbivańniaŭ AMAPam na akcyjach pratestu apazicyi, paviedamlaŭ, što jaho stan značna pahoršaŭ mienavita va ŭnutranaj turmie KDB, dzie jon znachodziŭsia pieršyja paŭhoda aryštu.

Palitviaźnia prymušali biehać z matracam i dźviuma torbami pa leśvicy ŭ časie pastajannych pieratrusaŭ, jon stajaŭ na raściažcy pa hadzinie, a to i pa dźvie, u palitviaźnia nie było spalnaha miesca, i jon spaŭ na doškach na chałodnaj padłozie. Kamiera była biez prybiralni, i heta była sapraŭdnaje katavańnie.

Siońnia ž Źmicier Bandarenka jašče paviedamiŭ, što ŭ kancy studzienia jon trapiŭ u SIZA ŭ karcar i pieršyja hadziny jaho trymali tam na łancuhu. U karcar jon patrapiŭ paśla taho, jak źviarnuŭsia za dapamohaj da lekara z-za jazvy straŭnika.

«Chartyja-97»

• 0
• 0
• 0
• 0
• 0
• 0
• 0
• 0