U Homieli ŭ Dzień desantnikaŭ abvieščany Dzień ćviarozaści i adklučany fantany
U Homieli z 7.00 2 žniŭnia da 7.00 3 žniŭnia, zhodna z rasparadžeńniem harvykankama, zabaroniena realizacyja ałkaholnych, słabaałkaholnych napojaŭ i piva ŭ handlovych abjektach horada, za vyklučeńniem stacyjanarnych handlovych abjektaŭ hramadskaha charčavańnia. "Dzień ćviarozaści pravodzicca ŭ Homieli z metaj prapahandy zdarovaha sposabu žyćcia, a taksama prafiłaktyki pjanstva i ałkahalizmu siarod moładzi",— paviedamlaje adździeł ideałahičnaj pracy harvykankama.
U Homieli Dzień ćviarozaści ŭ 2011 hodzie pravodzicca ŭpieršyniu. U lutym 2010 hoda staršynia Homielskaha harvykankama Viktar Pilipiec zajaviŭ, što dzion ćviarozaści ŭ abłasnym centry bolš nie budzie, tamu što kiraŭnik horada nie bačyć efiektu ad takoj miery i abmiežavańni na prodaž śpirtnoha skaračajuć pastupleńni ŭ biudžet.
Pra toje, ci źviazana praviadzieńnie Dnia ćviarozaści z Dniom PDV, karespandent BiełaPAN pacikaviŭsia ŭ načalnika adździeła ideałahičnaj pracy harvykankama Hanny Šydłoŭskaj. "Jany (desantniki) sami sabie pravodziać, my — sami sabie. Biez kamientaryjaŭ", — skazała Šydłoŭskaja.
Aprača taho, 2 žniŭnia ŭ Homieli adklučyli fantany. Ci źviazana hetaj z tradycyjaj byłych vajennasłužačych kupacca ŭ ich — nieviadoma.
"Milicyja budzie adekvatna reahavać na najaŭnaje apieratyŭnaje stanovišča, kab zabiaśpiečyć hramadski paradak i spakoj hramadzian", — zapeŭniŭ BiełaPAN načalnik upraŭleńnia achovy pravaparadku i prafiłaktyki UUS Homielskaha abłvykankama Anatol Vasiljeŭ.
Pavodle jaho słoŭ, u Homielskaj vobłaści za raśpivańnie śpirtnych napojaŭ i źjaŭleńnie ŭ niećviarozym stanie ŭ hramadskich miescach za šeść miesiacaŭ 2011 hoda składziena bolš jak 18,5 tys. administracyjnych pratakołaŭ. Hod tamu ich było na 2 tys. mienš. Razam z tym źniziłasia kolkaść złačynstvaŭ, učynienych u stanie ałkaholnaha apjanieńnia. U 2010 hodzie za siem miesiacaŭ ich było 2.666, sioleta — 2.362. Taksama skaraciłasia kolkaść pamierłych ad vypadkovaha atručeńnia ałkaholem — za paŭhoda ŭ 2011 hodzie zahinuli 149 čałaviek, za šeść miesiacaŭ 2010 hoda — 227. Za siem miesiacaŭ 2011 hoda ŭ ŁPP byli adpraŭleny 593 čałavieki (585 — letaś).
Kamientary