U sudzie Homielskaha rajona 22 žniŭnia pačaŭsia razhlad isku handlovaha doma «Milča» AAT «Homielskaja ptuškafabryka» da rabotnikaŭ mahazina ŭ vioscy Babovičy Homielskaha rajona. Pradpryjemstva maje namier spahnać z pradaŭcoŭ niastaču ŭ 71 młn. rubloŭ.
Intaresy adkazčykaŭ vykładaje ŭ sudzie pravavy inśpiektar prafsajuza rabotnikaŭ REP pa Homielskaj vobłaści Leanid Sudalenka.
«Mahazin absłuhoŭvaje viaskoŭcaŭ, a vyjaŭlenaja niastača bujnaja. Dumaju, što pradaŭcy nie majuć dačynieńnia da niastačy. Try pradaŭcy, uklučajučy zahadčycu mahazina, pahadzilisia z vyjaŭlenaj niastačaj i ŭnieśli bolš za 30 młn. rubloŭ. A voś try inšyja naadrez admaŭlajucca płacić, zajaŭlajučy pra nievinavataść.
Cikava, darečy, adkul u ścipłaj zahadčycy viaskovaha mahazina z akładam 700 tys. rubloŭ raptam uziałasia suma 25 młn., jakuju jana ŭniesła za siabie i dačku, taksama pradaŭca?»— prakamientavaŭ Sudalenka.
Pavodle jaho słoŭ, na sudzie rabotniki mahazina skazali, što za ŭsio ŭ mahazinie adkazvała zahadčyca. «Pavodle słoŭ pradaŭcoŭ, navat padčas ramontu prodaž tavaru nie spyniaŭsia, budaŭniki ŭ zahadčycy brali tavary ŭ doŭh. U sudzie taksama byŭ vyjaŭleny fakt prodažu niaŭličanaha śpirtnoha, kali pavodle prośby zahadčycy ŭ mahazin zavoziłasia tannaje vino, vyručka ad jakoha nie prachodziła pa kasie», — adznačyŭ pravavy inśpiektar.
Nastupnaje pasiadžeńnie adbudziecca 9 vieraśnia. Pavodle chadajnictva Sudalenki ŭ sud vyklikany śviedkami ŭsie rabotniki mahazina.
Heta nie pieršy vypadak, kali prafsajuz REP dapamahaje pradaŭcam, abvinavačanym u niastačy ŭ mahazinie, apraŭdacca ŭ sudzie. Da prykładu, u 2009 hodzie rašeńniem suda Centralnaha rajona Homiela 14 zvolnienych pradaŭcoŭ mahazina AATH «Centr» byli adnoŭleny ŭ raniejšych pasadach, sud taksama spahnaŭ prykładna 30 młn. rubloŭ na ŭsich rabotnikaŭ u jakaści kampiensacyi za čas vymušanaha prahułu. Rabotniki byli zvolnieny paśla vyjaŭleńnia niastačy. Prafsajuz REP dapamoh im padrychtavać kalektyŭny isk u sud.
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii15
Kamientary