Mokry śnieh pojdzie pad kaniec tydnia

Siaredniasutačnaja tempieratura pavietra ŭ Biełarusi ŭžo dvoje sutak nie pieravyšaje plus 4-7 hradusaŭ, što na 1-4 hradusy chaładniej, čym zvyčajna, paviedamiła hałoŭny sinoptyk Respublikanskaha hidramieteacentra Ludmiła Paraščuk.

U pieršuju pałovu tydnia aktyŭnaja cykłaničnaja dziejnaść paŭnočnaj Atłantyki budzie kiravać nadvorjem i ŭ Biełarusi. Atmaśfiernyja franty adzin za adnym buduć pieramiaščacca praz terytoryju krainy, ustalujecca chałodnaje nadvorje.

U bližejšyja sutki, 11 kastryčnika, u cełym pa Biełarusi budzie vobłačnaje z prajaśnieńniami nadvorje. Nočču časam čakajucca daždžy. Udzień na bolšaj častcy terytoryi krainy prahnazujucca karotkačasovyja daždžy, u asobnych rajonach prahrymiać navalnicy. Nočču i ranicaj pa paŭdniovym uschodzie miescami mahčymy słaby tuman. Viecier paŭdniova-zachodni, ad 6 da 11 mietraŭ za siekundu, miescami jaho paryvy dasiahnuć 15-20 mietraŭ za siekundu.

Minimalnaja tempieratura pavietra ŭ načny čas nie pierasiahnie plus 3-9 hradusaŭ. Maksimalnaja ŭdzień składzie 9-14 hradusaŭ ciapła.

Pačynajučy ź sierady, z kožnym dniom budzie stanavicca ŭsio chaładniej.

Paŭdniova-zachodni viecier pastupova źmienicca paŭnočnym, i ŭ kancy rabočaha tydnia čakajecca prychod u Biełaruś arktyčnaha pavietra z akvatoryi paŭnočnych moraŭ. Siaredniasutačnaja tempieratura pavietra pačnie pavolna nabližacca da nulavoj adznaki. 12 kastryčnika čakajecca pachmurnaje daždžlivaje nadvorje z paryvistym zachodnim vietram. Tempieratura pavietra ŭnačy nie pierasiahnie plus 3-9 hradusaŭ. Maksimalnaja ŭdzień składzie 7-13 hradusaŭ ciapła.

13 kastryčnika charaktar nadvorja nie źmienicca. Ale ŭdzień na niekalki hradusaŭ budzie chaładniej. U piatnicu, 14 kastryčnika, padźmie paŭnočny viecier i stanie jašče chaładniej. Tempieratura ŭnačy budzie vahacca ad minus 1 da plus 4 hradusaŭ. Miescami čakajecca 2-4 hradusy marozu. Udzień prahnazujecca 4-9 hradusaŭ ciapła. U piatnicu nočču miescami, a dniom na bolšaj častcy terytoryi respubliki projduć karotkačasovyja daždžy.

Na vychadnych rost atmaśfiernaha cisku ŭzmocnić upłyŭ na nadvorje chałodnaha antycykłonu. Uźnikšy kala bierahoŭ Hrenłandyi, hety antycykłon pačnie pieramiaščacca na poŭdzień i ŭ niadzielu jaho centr čakajecca nad susiedniaj Polščaj. Pastupova ścichnie viecier, źmienšycca vobłačnaść.

U subotu budzie pieravažna biez apadkaŭ. Tolki va ŭschodnich rajonach Biełarusi miescami projduć karotkačasovyja apadki - mokry śnieh z daždžom. Tempieratura pavietra ŭ načny čas budzie vahacca ad minus 3 hradusaŭ da plus 3 hradusaŭ.

Udzień čakajecca plus 3-9 hradusaŭ.

U niadzielu, 16 kastryčnika, budzie biez apadkaŭ. Nočču i ranicaj zhuścicca tuman. Tempieratura pavietra ŭnačy składzie minus 4 - plus 3 hradusy. Na tarfianikach Paleśsia čakajecca 5-8 hradusaŭ marozu. Maksimalnaja tempieratura pavietra ŭdzień budzie vahacca ad plus 4 hradusaŭ na paŭnočnym uschodzie krainy da 11-13 hradusaŭ na zachadzie Hrodzienskaj i Bresckaj abłaściej.

Taki tempieraturny fon budzie na 3-5 hradusaŭ nižejšy za klimatyčnuju normu

• 0
• 0
• 0
• 0
• 0
• 0
• 0
• 0