«Źjechali dziasiatki, viartajucca adzinki»

Represii suprać apazicyi paśla vybaraŭ 19 śniežnia sparadzili chvalu emihracyi z krainy. Z taho času prajšło dziesiać miesiacaŭ.

Z palituciekačoŭ viarnuŭsia tolki adzin — Andrej Kim.

Čaćviora ŭciekačoŭ stali fihurantami kryminalnaj spravy: Aleś Michalevič, Natalla Radzina, Mikita Krasnoŭ, Leanid Navicki. Pieršyja dvoje prajšli praź izalatar KDB.

Michalevič atrymaŭ palityčny prytułak u Čechii, Radzina — u Litvie. Kryminalnuju spravu ŭ adnosinach da Radzinaj spynili za adsutnaściu składu złačynstva.

Davieranaja asoba Alesia Michaleviča Mikita Krasnoŭ ciapier znachodzicca ŭ Varšavie. Paśla padziej 19 śniežnia jon vyjechaŭ u Vilniu, dzie vučyŭsia ŭ EHU. Zatym — u Polšču.

Mikita ničoha nie viedaje pra svoj ciapierašni status. «Davaŭ zapyt u červieni. Ale adkazu tak i nie atrymaŭ. Bo patrabavali, kab ja źjaviŭsia asabista». Viartacca ŭ Biełaruś nie śpiašajecca. «Jość abjektyŭnyja rečy, jakija pakul nie dazvalajuć zrabić taki krok». Prasić palityčnaha prytułku pakul nie choča.

Palityčny prytułak va Ukrainie i Polščy paprasiła davieranaja asoba Mikałaja Statkieviča Viktar Kancavienka. U błokbastary BT «Płošča. Žalezam pa škłu» jamu prypisvałasia rola čałavieka, jaki nibyta zamaŭlaŭ u Žłobinie vyrab mietaličnaj armatury dla pahromaŭ.

Źmicier Barodka, davieranaja asoba Sańnikava, ciapier u Varšavie. «Pieršaja dumka była — pieračakać uvieś hety hvałt. Asensavać, što adbyłosia, vyznačycca z dalejšaj taktykaj i stratehijaj dziejańniaŭ». Z kalehami Źmicier adčyniŭ Biełaruski Dom u polskaj stalicy.

«Zastavacca tut ci viartacca — heta ŭ vialikaj stupieni zaležyć ad taho, ci buduć spynieny represii suprać demakratyčnaj hramadskaści, ci buduć vyzvaleny lidary apazicyi», — kaža Z.Barodka.

Juraś Alejnik, davieranaja asoba Uładzimira Niaklajeva, vyjechaŭ u Litvu. Ciapier užo znachodzicca ŭ Rasii. «Usio vielmi chutka mianiajecca ŭ adroźnieńnie ad viasny. Siońnia ja tut, a zaŭtra mahu być na radzimie».

Aktyvist ź Białyničaŭ Aleh Miacielica ŭ Litvie. Na vybarach jon źjaŭlaŭsia davieranaj asobaj Niaklajeva. U Vilni ŭznačalvaje ofis Hramadzianskaha i palityčnaha pradstaŭnictva Biełarusi. Aleh spadziajecca, što sioleta ŭsio-tki vierniecca ŭ krainu. A nie viarnuŭsia raniej, bo ličyć, što niebiaśpieka zastajecca: «Nie mahu ryzykavać, pakul nie naładžu pracu pradstaŭnictva».

Inšaja davieranaja asoba Niaklajeva, pradprymalnik z Barysava Viktar Harbačoŭ, taksama ŭ Vilni. «Płanuju viarnucca. Da Novaha hoda dakładna. Dumaju, ułada i siłaviki chacieli b, kab my tut zastalisia nazaŭždy».

Va Ukrainie znachodzicca dysident Viačasłaŭ Siŭčyk. U vieraśni ŭ Lvovie pačało pracu hramadskaje abjadnańnie «Biełaruski centr», jakoje jon uznačaliŭ.

Julija Słuckaja, jakaja kansultavała štab Niaklajeva, u Varšavie spačatku zasnavała Biuro salidarnaści z demakratyčnaj Biełaruśsiu, a paśla z kalehami adkryła «Pres-Kłub Biełaruś».

Za miažoj zastajucca taksama kiraŭniki «Svabodnaha teatra» Mikałaj Chalezin i Natalla Kalada, adzin ź lidaraŭ «Pravaha aljansu» Juryj Karetnikaŭ, kiraŭnik łabaratoryi «Novak» Andrej Vardamacki, a taksama dziasiatki emihrantaŭ raniejšych chvalaŭ.

• 0
• 0
• 0
• 0
• 0
• 0
• 0
• 0