Chto druhi paśla Łukašenki?

Michaił Miaśnikovič

Kali źviarnucca da zakanadaŭstva, to artykuł 15 Zakona «Ab prezidencie Respubliki Biełaruś» adznačaje: «U vypadku vakansii pasady prezidenta ci niemahčymaści vykanańnia im svaich abaviazkaŭ pa pryčynach, praduhledžanych Kanstytucyjaj, jaho paŭnamoctvy da pryniaćcia prysiahi novym vybranym prezidentam pierachodziać da premjer-ministra. Pry hetym vybary prezidenta pavinny być praviedzienyja nie raniej čym praz 30 dzion i nie paźniej čym praz 70 dzion paśla adkryćcia vakansii».

Takim čynam,

farmalna druhim čałaviekam u dziaržavie źjaŭlajecca premjer-ministr Michaił Miaśnikovič.

Razam z tym, Miaśnikovič, jak i minułyja premjery, u asnoŭnym zasiarodžvajecca na ekanamičnych i sacyjalnych pytańniach.

Varta adznačyć, što padčas minułych prezidenckich vybaraŭ kandydaty chacieli razyhrać kartu z premjer-ministram. Ludzi na płoščy Niezaležnaści dabivalisia sustrečy ź Sidorskim, jaki b moh uziać uładu ŭ vypadku nieabrańnia Łukašenki.

Tady hety chod nie prajšoŭ, Sidorski tak i nie źjaviŭsia pierad demanstrantami, a potym uvohule zhubiŭ miesca kiraŭnika ŭrada.

Rubinaŭ, Andrejčanka, Mikłaševič

Kali ŭ krasaviku 2010 u Polščy raźbiŭsia samalot z prezidentam Lecham Kačynskim, kiravańnie krainaj pieraniaŭ maršałak Sojma Branisłaŭ Kamaroŭski.

Farmalna ŭ Biełarusi śpikier vierchniaj pałaty parłamienta źjaŭlajecca treciaj u krainie asobaj. Savietam respubliki ciapier kiruje 72-hadovy Anatol Rubinaŭ.

Bolšuju častku svajho žyćcia Rubinaŭ adpracavaŭ u navucy. Užo ŭ łukašenkaŭski čas jon byŭ namieśnikam kiraŭnika Administracyi prezidenta. Rubinaŭ viadomy svaimi radykalnymi, ledź nie stalinisckimi pohladami.

Śpikieram savieta respubliki jon staŭ letaś, paśla pieravodu Barysa Batury ŭ staršyni Minskaha abłvykankama. Dla Rubinava miesca ŭ parłamiencie — heta siniekura. Praca, što nie prynosić turbot, ale za jakuju maje hrošy i pryvilei.

Anałahična možna razhladać i śpikiera pałaty pradstaŭnikoŭ Uładzimira Andrejčanku. Dla jaho miesca ŭ parłamiencie taksama było ŭznaharodaj za viernuju słužbu ŭ Viciebskaj vobłaści.

Farmalna, Rubinaŭ i Andrejčanka — heta kiraŭniki orhanaŭ zakanadaŭčaj ułady ŭ krainie. Tym nie mienš, parłamient nikoli nie ŭstaje na šlachu prapanovaŭ prezidenta ci ŭrada.

Kali havaryć pra sudovuju ŭładu, to jana znachodzicca ŭ rukach staršyni Kanstytucyjnaha suda Piatra Mikłaševiča. Siońnia rola hetaha ŭradženca Vilejščyny zusim nie zaŭvažnaja, ale moža nieparaŭnalna vyraści ŭ vypadku nadzvyčajnaj situacyi.

Viktar Łukašenka

Starejšy syn Łukašenki zajmaje ścipłuju pasadu pamočnika kiraŭnika dziaržavy pa biaśpiecy. Ale heta značyć, što mienavita da jaho ściakajecca ŭsia infarmacyja pra ŭsich i ŭsio.

Užo zabyłasia supraćstajańnie KDB i milicyi za časami Šejmana. Abiedźvie struktury ciapier u padnačaleńni Viktara Łukašenki. Hienieralnuju prakuraturu, Śledčy kamitet, Apieratyŭna-analityčny centr, Pamiežny kamitet taksama ŭznačalvajuć ludzi, blizkija da Viktara.

Faktyčna,

sa zhody baćki Viktar Łukašenka skancentravaŭ u svaich rukach uładu nad asnoŭnymi siłavymi viedamstvami krainy.

Uładzimir Makiej

Adzin z najbližejšych paplečnikaŭ Łukašenki — kiraŭnik jahonaj administracyi. Makiej maje ŭpłyŭ na pryniaćcie rašeńniaŭ, Łukašenka jamu daviaraje.

Raźviedčyk Makiej vałodaje anhielskaj i niamieckaj movami. Jamu naležyć rola kamunikatara z Zachadam.

Usie, chto byŭ znajomy z Makiejem, adznačajuć jahony rozum i chitraść, jakimi jon i dabiŭsia takoha stanovišča. Mienavita Makieja nazyvali aŭtaram palityki «libieralizacyi», što była ŭ krainie ŭ 2008—2010.

Žadobin i Zajcaŭ

U pierałomnyja histaryčnyja momanty ŭładu ŭ krainie niaredka biare vojska.

Paśla revalucyi ŭ Jehipcie, kali ad prezidenctva byŭ adchileny Mubarak, uładu ŭ krainie ŭziała Najvyšejšaja rada Uzbrojenych siłaŭ na čale ź ministram abarony Chusejnam Tantavi.

U biełaruskim hramadstvie vojska nie maje takoha aŭtarytetu i prestyžu, jak u arabskich krainach. Łukašenka taksama pieraścierahajecca, staviačy na pasadu ministra abarony nie samych jarkich asobaŭ.

Ciapier ministram źjaŭlajecca Juryj Žadobin, jaki nie moža mieć nijakich palityčnych ambicyj, bo naradziŭsia nie ŭ Biełarusi. Raniej byŭ Leanid Malcaŭ, aŭtarytet jakoha niekali źniščyŭ Łukašenka: publična abvinavaciŭ u pjanstvie i vyhnaŭ z pracy.

Zatoje

prestyžam i ŭładaj karystajecca Kamitet dziaržaŭnaj biaśpieki.

KDB atrymlivaje ledźvie nie nieabmiežavanyja paŭnamoctvy, pra što śviedčyć novy zakon «Ab orhanach dziaržbiaśpieki». Zrešty, Zajcaŭ, jak i ministr unutranych spravaŭ Kulašoŭ, taksama rodam nie ź Biełarusi.

• 0
• 0
• 0
• 0
• 0
• 0
• 0
• 0