Ukrainskija čynoŭniki kažuć, što heta całkam realna. Ale ŭ siecivie pakul niama navat sajtu budučaha lvoŭskaha metro. …U adroźnieńnie ad ščučynskaha!
«Jość prapanova zamianić padziemny tramvaj, pra jaki tak daŭna havaryli, na mały metrapaliten na mahnitnaj padušcy. Małoje metro aznačaje, što budzie značna mienšy dyjametar samoha tunelu, čymści ŭ zvyčajnym metro. Dla nas ciapier heta fantastyčnaja reč. Mahčyma, pra metro ŭ nastupnyja 5 hadoŭ havaryć składana, ale voś za nastupnyja 10 hadoŭ — heta realnaść. Pra heta śviedčyć vyvučeńnie dynamiki horadaŭtvareńnia», — raskazaŭ «Lvoŭskamu partału» načalnik adździełu hieneralnaha planu ŭpraŭleńnia architektury i horadabudaŭnictva Lvova Raman Andrusišyn.
Hałoŭny architektar Lvovu Jury Kryvaručka ŭdakładniaje: Heta maje być metrapaliten palehčanaha ŭzoru, jaki nie stvaraje takoj vibracyi, jak zvyčajnaje metro. Adna linija metro projdzie ad Paŭdniovaha rynku paŭz Pryvakzalnuju, pačatak Haradockaj, Hajdamackaj da Zamarstyniŭskaj, a druhaja budzie złučać Rasne ź Sivocham cieraź Zialonuju i Vińničenki. Adnak dla budaŭnictva, viadoma, patrebna bolej času, a jašče bolej vydatkaŭ, tak što naŭrad ci lviavianie zmohuć padarožničać pad ziamloj raniej za 2020 hod.
Metro dla horadu — bolej jak srodak hramadzkaha transpartu. Pra heta śviedčyć i historyja z pačatkam pabudovy mienskaha metro, kali stalicu «daciahvali» da parametraŭ horadu-miljanera, a tolki takim u Sajuzie možna było atrymać dazvoł na «padziemku». Śviedčańnie hetamu i virtualnyja metrapaliteny, jakija isnujuć tolki ŭ siecivie dy marach mieścičaŭ-entuzijastaŭ.
I ŭ hetym sensie naš Ščučyn daść foru Lvovu. U ščučynskaha metro, u adroźnieńnie ad lvoŭskaha, svoj sajt užo jość. Jano składajecca z troch linij: Haradzienskaj, Pijarskaj i Biełaruska-Kupałaŭskaj, było pabudavanaje ažno ŭ 60-ja hady, ale «vyjaŭlenaje» tolki ŭ 1998-m.
Niahledziačy na toje, što sajt ščučynskaha metrapalitenu raźmieščany ŭ rubrycy «humar», Ščučynu ad takoj mistyfikacyi adnyja plusy. Biełaruskaje miastečka traplaje ŭ davoli karotki śpis haradoŭ ź virtualnym metrapalitenam pobač z Karalaŭcom, Branskam, Ułan-Bataram, Nabiarežnymi Čałnami. Dyj sam fakt takoha prajektu jość najlepšaj charaktarystykaj horadu i mieścičaŭ: značyć, horad lubiać, i značyć, horad jość za što lubić.
Ciapier čytajuć
Rasijski pradaviec paśpiachovaha pośpiechu pasprabavaŭ adkryć filijał u Minsku. Reakcyja biełarusaŭ była pakazalnaj7
Rasijski pradaviec paśpiachovaha pośpiechu pasprabavaŭ adkryć filijał u Minsku. Reakcyja biełarusaŭ była pakazalnaj
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić3434
Kamientary