Pracoŭnaja hrupa Bałonskaha pracesu: Biełaruś nie hatovaja
Akramia inšaha, biełaruskija ŭłady musiać «zabiaśpiečyć abaronu pravoŭ studentaŭ».
«Biełaruś nie hatovaja dałučycca da Jeŭrapiejskaj prastory vyšejšaj adukacyi», — taki vierdykt vyniesła pracoŭnaja hrupa Bałonskaha pracesu.Pasiedžańnie hrupy, jakaja pradstaŭlaje ŭsie 47 krain-udzielnic Bałonskaha pahadnieńnia, prajšło 18–19 studzienia ŭ Kapienhahienie. Pracoŭnaja hrupa Bałonskaha pracesu (Bologna Follow-Up Group) zajmajecca biahučymi pytańniami Jeŭrapiejskaj prastory vyšejšaj adukacyi. Mienavita jana vyvučała biełaruskuju zajaŭku na dałučeńnie da Bałonskaha pracesu.
Pavodle acenki Pracoŭnaj hrupy, jakuju ciapier uznačalvajuć Danija i Azierbajdžan, Biełaruś nie vykonvaje pryncypy i kaštoŭnaści Bałonskaha pracesu, takija jak akademičnaja svaboda, instytucyjnaja aŭtanomija i studencki ŭdzieł u kiravańni vyšejšaj adukacyjaj.
Ministar adukacyi Danii Mornet Osterhraad, što ciapier uznačalvaje Pracoŭnuju hrupu, adznačaje, što dla dałučeńnia da Jeŭrapiejskaj prastory vyšejšaj adukacyi Biełaruś musić pravieści «nieabchodnyja reformy».
Akramia inšaha, biełaruskija ŭłady musiać «zabiaśpiečyć abaronu pravoŭ studentaŭ».A pakul hetaha nie adbudziecca, Jeŭropa budzie ŭzajemadziejničać ź Biełaruśsiu praź inšyja šlachi.
U jeŭrapiejcaŭ nie ŭkładajecca ŭ hałavie, jak možna vyklučać studentaŭ z univiersitetaŭ za ŭdzieł u palityčnaj dziejnaści. U svoj čas ahidu jeŭrapiejcaŭ vyklikali spravy Chomy i Šapućki.
Mahčymaść vykładać u biełaruskich univiersitetach taksama zaležyć ad palityčnych pohladaŭ i łajalnaści, asabliva ŭ rehijanalnych VNU.
U Biełarusi niemahčyma stvaryć VNU, kali zasnavalnik nie źviazany z łukašenkaŭcami.Typovy prykład: EHU pazbavili rehistracyi, i jon dahetul vymušany pracavać u Vilni.
«Jość inšyja šlachi dapamahčy biełaruskaj hramadzianskaj supolnaści, u pryvatnaści, studentam i akademičnaj supolnaści», —havorycca ŭ aficyjnaj zajavie ministra navuki, inavacyj i vyšejšaj adukacyi Danii Mornet Osterhraad. — Danija padtrymlivaje i praciahnie padtrymlivać the Open Europe Scholarship Scheme — stypiendyjalnuju prahramu «Adkrytaja Jeŭropa», jakaja dazvalaje maładym biełarusam atrymać dostup da vyšejšaj adukacyi ŭ jeŭrapiejskich univiersitetach».
Dakład Pracoŭnaj hrupy budzie pradstaŭleny 47 ministram vyšejšaj adukacyi krain Bałonskaha pracesu 26–27 krasavika na samicie ŭ Buchareście. Tam i budzie pryniataje kančatkovaje rašeńnie.Mierkavańnie hrupy značyć šmat, i, imavierna, stanie vyrašalnym pry abmierkavańni biełaruskaj zajaŭki na dałučeńnie da pracesu.
Dałučycca da Bałonskaj dekłaracyi biełaruskija ŭłady nadumalisia ŭletku 2010 hoda. U listapadzie 2011 hoda była padadzienaja aficyjnaja zajaŭka.
Dahetul nie było vypadkaŭ, kali zajaŭku krainy, što žadała ŭvajści ŭ Bałonski praces, adchilali z-za jaje nieadpaviednaści kryteram Adzinaj prastory vyšejšaj adukacyi. U Bałonski praces pryniali navat takija aŭtarytarnyja krainy, jak Kazachstan i Azierbajdžan.
Vypadak Biełarusi moža stać biesprecedentnym.Praŭda, i ideałahičny kantrol nad studentami i prahramami ŭ Biełarusi najmacniejšy. Niama druhoj takoj krainy, dzie supracoŭniki śpiecsłužbaŭ pačuvajucca ŭ dekanatach jak usiomahutnyja haspadary.
Bałonski praces – miechanizm zbližeńnia sistem adukacyi ŭ Jeŭropie.Rasija dałučyłasia da jaho ŭ 2003 hodzie, Ukraina – u 2005-m, Kazachstan – u 2010-m. Jon zabiaśpiečvaje ŭzajemnaje pryznańnie dypłomaŭ. Taksama jon daje adzinyja krytery acenki jakaści adukacyi, a studentam – mahčymaść vybaru dyscyplin, jakija jany vyvučajuć. Studenty i vykładčyki majuć mahčymaść pierajazdžać z univiersiteta va ŭniviersitet i z krainy – u krainu.
Akramia aficyjnaha dakładu Minadukacyi, Pracoŭnaja Bałonskaja hrupa razhladała i alternatyŭny dakład hramadskaha Bałonskaha kamiteta,stvoranaha pradstaŭnikami hramadzianskaj supolnaści Biełarusi. U im havaryłasia ab šmatlikich parušeńniach akademičnych svabodaŭ, adličeńniach studentaŭ i zvalnieńniach vykładčykaŭ za ich palityčnuju pazicyju.
Alternatyŭny dakład prapanoŭvaŭ zapatrabavać ad Biełarusi pravieści reformy pierad dałučeńniem da Bałonskaha pracesu.
Suprać dałučeńnia Biełarusi vystupiŭ Jeŭrapiejski studencki źviaz, polskija i litoŭskija abjadnańni studentaŭ.
Biełaruś zastajecca adzinaj i apošniaj krainaj Jeŭropy, jakaja nie źjaŭlajecca častkaju Bałonskaha pracesu.Kali biełaruskuju zajaŭku adchilać, nastupny šaniec dałučycca naša kraina atrymaje tolki ŭ 2014 hodzie.
Biełaruś zastajecca taksama adzinaj krainaj Jeŭropy, jakaja nie ŭvachodzić u Radu Jeŭropy. I Rasija, i Ukraina, i Litva, i Polšča ŭvachodziać u abiedźvie hetyja struktury.
Chtości pakrytykuje rašeńnie jeŭrapiejskaj univiersiteckaj supolnaści — maŭlaŭ, uklučeńnie ŭ Bałonski praces nabliziła b biełarusaŭ da Jeŭropy. Chtości ŭchvalić: heta dapamahło b dyktataru puścić pył u vočy i straciŭsia b stymuł da pieramien.
A vy jak dumajecie — pravilnaje rašeńnie pryniała Bologna Follow-Up Group ci nie?
Prakuratura pra śmierć Miełkaziorava: žurnalist mieŭ chraničnuju chvarobu17
Prakuratura pra śmierć Miełkaziorava: žurnalist mieŭ chraničnuju chvarobu
Fiaduta — Kaleśnikavaj: Mašańka, ci viarniciesia na Miesiac, ci nie vučycie žyć tych, chto stamiŭsia nabivać huzy ad čarhovaha nastupańnia na hrabli3535
Kamientary