Maskva pryśpiešvaje "durnyja prajekty"...

Siońnia kiraŭnik "Transnafty" Siamion Vajnštok zajaviŭ: rašeńnie pra trubu ŭ abychod Biełarusi moža być pryniataje ciaham tydnia-dvuch. A pabudujuć jaje za 18 miesiacaŭ.

Pavialičyć

Sa słoŭ Vajnštoka, možna było b źmienšyć naftavy tranzyt praź Biełaruś udvaja.

Darečy, proźvišča kiraŭnika "Transnafty" tak časta fihuruje ŭ zahałoŭkach na hetuju temu, što ŭ šarahovaj publiki moža skłaścisia ŭražańnie, što truba z Uniečy na Prymorsk — prychamać aliharcha. Moža, tak pakryŭdziŭsia za pozvu ŭ biełaruski sud? :)

Nasamreč dyversyfikavać tranzyt "čornaha zołata" ŭ Eŭropu zahadaŭ asabista Pucin. Pryčym, jak vynikaje ź interviju Vajnštoka "Kommiersantu", ideja truby Unieča — Prymorsk uźnikła jašče letaś uvosień. To bok Maskva hruntoŭna rychtavałasia da naftahazavaj vajny, u jakuju Miensk, musić, nie chacieŭ vieryć da apošniaha.

Miž inšym, pavodle "Recha Maskvy", u razhar naftavaha kanfliktu rasiejski ministar Chrystenka zajaŭlaŭ, što ŭ siarednieterminovaj perspektyvie tranzyt praź Biełaruś možna budzie "całkam zamiaścić".

Kali plany truby na Prymorsk stali viadomyja, Alaksandar Łukašenka sarkastyčna zaznačyŭ, što "tolki tyja, chto ŭvohule nia ŭmieje ličyć da dziesiaci, zdolnyja vykarystoŭvać takija maršruty".

Faktyčna kamień palacieŭ nie ŭ Vajnštokaŭ, a ŭ Pucinaŭ harod.

Nu a haspadar Kramla peŭna choča davieści, što ličyć umieje. Pryčym nia tolki da dziesiaci, a na miljony dy miljardy. Bo ŭ vyniku naftahazavaj vajny ź Mienskam imidžavyja straty Rasiei jak pastaŭnika enerharesursaŭ vylilisia ŭ kruhleńkija sumy.

Karaciej, tranzytnyja kozyry ŭ Biełarusi pavybivajuć.

Budujecca ž, nahadaju, i Paŭnočnaeŭrapiejski hazapravod, jaki Łukašenka nazvaŭ "samym durnym prajektam Rasiei" (na što krynica ŭ Kramli adhuknułasia iraničnaj replikaj: my, maŭlaŭ, tolki ŭpeŭnilisia, što robim pravilna).

Słovy Vajnštoka hučać jak zamaskavany ŭltymatum: "Kali budzie bolej vyhadna ekspartavać naftu cieraź Biełaruś na Zachad, jany pojduć cieraź Biełaruś, kali budzie bolej vyhadna chadzić cieraz Prymorsk, jany pojduć cieraz Prymorsk. U kampanijach pracujuć nadzvyčaj praktyčnyja ludzi, jany zaŭždy praličvajuć ekanomiku".

Dadamo: a tyja, chto nad kampanijami, dobra praličvajuć palityku. Nia varta dumać, što jany nia zdolnyja ličyć da dziesiaci.

Kaniešnie, uviedzienaje Mienskam u studzieni ekzatyčnaje myta na tranzyt nafty było rasiejskim strateham jak abuchom pa hałavie. Ale takija fokusy dvojčy nie prachodziać.

Pytańnie nastupnaje: u jaki bok padšturchnuć biełaruskaje kiraŭnictva hetyja maneŭry enerhietyčnaj imperyi?

Zachad peŭna ž adhuknuŭsia b na syhnał ab hatovaści da supracy. Litoŭski prezydent vuń užo kankretna prapanoŭvaŭ traisty chaŭrus suprać rasiejskaha naftahazavaha dyktatu. A ichni Brazaŭskas navat na sustreču z aficyjnym biełaruskim kiraŭnikom hatovy pryjechać, chaj tolki Brusel daść mandat.

Ale, musić, rana jamu kuplać kvitok na ciahnik da Miensku :)

Reč nia ŭ tym, što terminał u Kłajpedzie nam pakul što biez patreby, bo kuplać naftu na suśvietnych biržach dy vazić tankierami — usio adno daražej, čym brać u chcivych rasiejskich aliharchaŭ :(

Na dumku palitolaha Andreja Fiodarava, hałoŭnaja pieraškoda mierkavanamu dyjalohu z Eŭropaj — mentalnaść tutejšaha vysokaha načalstva.

Dumka pra Zachad vyklikaje, badaj, ekzystencyjny strach. Zachodniki ź ich chvaravitymi demakratyčnymi punktykami — jak inšaplanetniki, jak marsyjany. Nu a hulni ź imperyjaj — sprava zvykłaja. Dyj bizantyzm Kramla — reč zrazumiełaja, navat duchoŭna blizkaja, kali chočacie.

Ale ž čym dalej, tym bolej niebiaśpiečnyja hetyja hulni. I tym mieniej kozyraŭ na rukach.

• 0
• 0
• 0
• 0
• 0
• 0
• 0
• 0