Siońnia — hadavina terakta ŭ minskim mietro: prysud vykanany, pytańni zastalisia

Śledčym spatrebilisia niekalki dzion, kab zajavić pra zatrymańnie padazravanych u terakcie ŭ minskim mietro. Praź piać miesiacaŭ pačaŭsia sud. Apošniuju kropku ŭ hetaj hučnaj spravie pastavili za miesiac da hadaviny terakta. Adnosnaja chutkaść pracesu, asabliva na pačatkovaj i zaviaršalnaj stadyjach, i vyklikała bolšaść pytańniaŭ, jakija dahetul čakajuć adkazaŭ.

Pośpiech ci pravał?

Ułady nazyvajuć raskryćcio spravy 11 krasavika pośpiecham.

Jašče da abviaščeńnia prysudu šerah siłavikoŭ atrymaŭ uznaharody ad Łukašenki.

Adnak na spravu možna pahla¬dzieć pad inšym rakursam. Navat abapirajučysia pry hetym vyklučna na materyjały śledstva, ahučanyja ŭ sudzie, možna skazać, što pośpiecham tut i nie pachnie. Miarkujcie sami.

Zhodna z materyjałami spravy, Dźmitryj Kanavałaŭ z padletkavaha ŭzrostu kštałtavaŭ svajo čornaje majsterstva, kuplaŭ vybuchoŭku na rynku i tak i nie patrapiŭ u pole zroku pravaachoŭnych orhanaŭ. Niaŭžo takoje mahčyma? A kali mahčyma, to ci zrobleny vysnovy? A kali zrobleny vysnovy, to ci adchileny ad pasad vinavatyja? Akramia niaščasnaha pastavoha ŭ mietro i niadbajnaha daktyłohrafa? Adździeły KDB ciapier jość amal va ŭsich rajcentrach — ich našmat bolš, čym navat u saviecki čas. Pry hetym u Biełarusi nie składaje nijakich prablem nabyć vybuchoŭku.

Pavalnaja daktyłaskapija miljonaŭ mužčyn jak sposab vyjaŭleńnia aŭtarstva vybuchu 2008, pa vialikim rachunku, taksama abiarnułasia pravałam.

Spraviadlivy prysud ci sudovaja pamyłka?

Zastalisia vialikija pytańni pa psichałohii Kanavałava. Chulihanstva? Ale prahu skalečyć, a to i zabić dziasiatki čałaviek hetym nie patłumačyš. Što naradziła takija žadańni? U vyniku čaho takoje zdaryłasia?

Na hetaje pytańnie naŭrad ci ŭdasca znajści adkaz u bližejšy čas. A mahčyma, što i nikoli. Bo ni Kanavałava, ni Kavalova bolš niama ŭ žyvych.

Sprava Kanavałava vyjaviła ŭsiu hnil śledčaj i sudovaj sistemy, pry jakoj amal nie byvaje apraŭdalnych prysudaŭ, ale pry hetym lohka vykonvajucca lubyja palityčnyja zamovy. Pakul Kanavałaŭ uzryvaŭ (jak ćvierdzić sud), chtości sieŭ u turmu za padpał kijoska, a chtości šeść miesiacaŭ pravioŭ u SIZA pa padazreńni ŭ arhanizacyi vybuchaŭ u Viciebsku. Dy tak, što dziela alibi dahetul źbiraje čeki ŭ kramach.

Na žal, treba pryznać, što my majem spravu z zahannaj sistemaj, jakaja ŭ svoj čas sparadziła tak zvanuju «viciebskuju spravu», kali za zabojstvy Michasieviča byŭ rasstralany nievinavaty, a bolš za dziesiać čałaviek trapili ŭ turmu. Taja sprava była pad kantrolem Maskvy, i miascovyja śledčyja sa skury leźli, kab raskryć jaje.

A voś jašče niekalki prykładaŭ z najnoŭšaj historyi.

Hod tamu byŭ apraŭdany žychar Niaśviža, asudžany na 13 hadoŭ turmy za zabojstva. Jon pravioŭ u niavoli 8 hadoŭ. Milicyjanty, jakija vybivali ź jaho «pryznańni», i prakuror, što nakiravaŭ spravu ŭ sud, pajšli na pavyšeńnie.

U Viciebsku hrupa hramadzian dahetul patrabuje pakarać śledčych, jakija sprabavali paviesić na padletkaŭ zabojstva bamža. U časie śledstva dziaciej na miesiac adpravili ŭ Navinki, sadzili ich u kamieru da recydyvistaŭ i zabojcaŭ (vam heta nie nahadvaje spravu Kavalenki, turemnuju epapieju Sańnikava i Daškieviča? Mietady tyja samyja). Viciebskija śledčyja, jak i ich kalehi ź Niaśviža... pajšli na pavyšeńnie.

Śpis padobnych historyj možna doŭžyć. Ich abjadnoŭvaje niekalki charakternych momantaŭ. Śledčyja imknulisia luboj canoj raskryć spravu. I navat kali spravy razvalvalisia, jany byli ŭznaharodžanyja, a nie pakaranyja.

Čamu tak chutka?

Chutkaść pracesu — ci nie asnoŭnaja krynica niedavieru častki hramadstva, jakaja stavić pad sumnieŭ vyniki spravy. Hadami nie mahli złavić, a tut zatrymali ledź nie praz sutki pasiarod miehapolisa, sumniavajucca mnohija. Chutki rasstreł i źniščeńnie rečavych dokazaŭ u hetaj častki biełarusaŭ pakinuła ŭražańnie, jakoje možna apisać słovami «kancy ŭ vadu».

Navat kali śledčaja bryhada sumlenna zrabiła svaju spravu, ci možna vyklučyć, što Kanavałava prosta «viali» tyja, chto sapraŭdy zacikaŭleny ŭ «destabilizacyi abstanoŭki»? Na hetuju viersiju dziaržaŭnyja ŚMI kipiać praviednym hnievam: jak možna takoje dumać.

U demakratyčnych krainach pry padazreńniach na adras śpiecsłužbaŭ utvarajucca parłamienckija kamisii dla rasśledavańnia, u jakija ŭvachodziać jak pradstaŭniki ŭładaŭ, tak i pradstaŭniki apazicyi. Heta i daje harantyju niezaležnaha razboru samych składanych niedapracovak. Pakul takoha miechanizma ŭ Biełarusi niama, niedavier da ŭładaŭ budzie zachoŭvacca. Pakul apazicyja nie budzie ŭdzielničać u kantroli nad śpiecsłužbami, viery nie budzie.

Niama ludziej — a prablema jość

Zdavałasia b, paśla vybuchu 11 krasavika minskaje mietro pavinny ŭziać pad pilny kantrol. Adnak z taho momantu ŭ padziemcy adbyŭsia šerah incydentaŭ — ad kurjoznych da surjoznych. I kali fotasiesiju ŭ styli «niu» možna ŭsprymać z uśmieškaj, to vypadak, kali adnu sa stancyj prosta zabyli zamknuć na noč, prymušaje surjozna zadumacca.

Zrešty, vopyt krain, dzie vybuchi ŭ mietro zdaralisia nieadnojčy, śviedčyć, što całkam biaśpiečnaj padziemku zrabić amal niemahčyma. Nam treba ŭśviadomić: chto b ni ŭzarvaŭ mietro hod tamu, jon tym samym uklučyŭ Biełaruś u svojeasablivy kłub krain, dzie ŭsio moža zdarycca. I nam žyć z hetaj novaj realnaściu.

• 0
• 0
• 0
• 0
• 0
• 0
• 0
• 0