Rekordny dzień Łajvdžornału

Biełaruski livejournal, jaki nie pracavaŭ amal pałovu dnia, aktyŭna abmiarkoŭvaje siońniašniuju akcyju da Dnia Voli i kancerty BRSM la Nacyjanalnaj biblijateki i ŭ aeraporcie «Miensk-1». Najbolšaja kolkaść pastoŭ na hetuju temu źmieščana na supołcy minsk_by. Na hetym kamjunici siońnia było vystaŭlena zvyš sta dopisaŭ na temu Dnia Voli i akcyi apazycyi.

Šmat chto z žž-karystalnikaŭ paprostu kapijavaŭ paviedamleńni onłajn-repartažaŭ «Našaj Nivy» i radyjo «Svaboda». Inšyja pisali pra toje, što pa telefonach pieradavali ź mienskich vulic ichnyja siabry i svajaki. Trecija byli sami vidavočcami padziejaŭ i pisali pa viartańni dadomu.

Najbolšaje abmierkavańnie siońnia vyklikaŭ krytykanski post luft-a. Hety błohier piša: «Ja, kaniečnie, na pole boju nie prysutničaŭ, ale krychu ŭ kursie taho, što adbyvałasia tam. Arhanizacyja na nuli. Samo mierapryjemstva nahadała broŭnaŭski ruch malekuł u słoiku... Ja tak i nie zrazumieŭ, a jakaja była meta dadzienaha mierapryjemstva? Sonca-viasna-niezaležnaść? Čahości chacieli? Estetyka BNF raźlivu 1996 hodu... Adzinaje pravilnaje rašeńnie – heta iści da biblijateki. A tak – śviata atrymałasia. AMAP raźmiaŭsia paśla zimovaj śpiački, pabiehaŭ na soniejku. Dy nie adny jany, i nie adzin Łosieŭ nia staŭ achviaraj. Ura!». Hety post sabraŭ užo bolš za 100 kamentaroŭ, zbolšaha stanoŭčych.

Aliaksei vystaŭlaje zdymki , jak z pop-kancertu, jaki siońnia byŭ zładžany biełaruskimi ŭładami, tak i z śviatkavańnia Dnia Voli. Jość u Aliaksei i treciaja fotasesija z žyćcia milicyjantaŭ i AMAPaŭcaŭ.

Kabierac napisaŭ pra toje, jak staŭ śviedkam bojki miž dźviuma hrupoŭkami, jakija viartalisia z kancertu BRSM: «U dvary doma №23 pa vuł. Bryleŭskaj adbyłasia bojka pamiž dvuma hrupami moładzi, što pryjšli na kancert «Za niezaležnuju Biełaruś». Pjanyja maładziony ŭžyvali pruty i šklanyja butelki, mocna źbity adzin chłopiec, taksama raźbili kolki voknaŭ na pieršym paviersie domu №23. Napačatku chulihanaŭ utajmoŭvali miascovyja žychary, što viartalisia z akcyi, prymierkavanaj da Dnia Voli, paśla na miescy źjavilisia try milicyjanty. Jašče paźniej pryjechali aficery milicyi, padyšli kolki supracoŭnikaŭ DPS. Častcy zavadataraŭ bojki ŭdałosia źbiehčy ź miesca padziejaŭ, inšych, chto mieŭ parezy i rany ad škła, zabrali mašyny chutkaj dapamohi. Nieviadoma, ci zatrymali kaho-kolviek. U kvatery pieršaha pavierchu, dzie pabili vokny, žyvie babula-pensijanerka.Čyim koštam buduć raparavać šyby — nieviadoma. Ułady, milicyja j małady elektarat atrymali toje śviata, jakoha tak žadali».

Svojeasablivy onłajn-repartaž zrabiŭ oldmah, jon praanalizavaŭ usie padziei, što znachodzili adlustravańnie ŭ supołcy minsk_by i sparadkavaŭ ich u chranikalnym paradku ŭ svaim žž.

Namieśnik staršyni Partyi BNF Aleś Michalevič nastupnym čynam prakamentavaŭ siońniašnija padziei ŭ svaim «Žyvym žurnale»: «Užo dva dni maju pryŭźniaty nastroj. Učora, 24 sakavika ŭ parku Horkaha adbyłosia śviatkavańnia Hukańnia viasny… Škada, što siońnia, 25 sakavika, zavieršanaści akcyi nie atrymałasia. Chacia ahulna ŭražańnie ad ludziej było vielmi dobraje. Pryjemna, što ŭ Biełaruś pryjechaŭ lider azerbajdžanskaj apazycyi Isa Hambar. Heta vielmi cikavy čałaviek, jaki na pačatku 90-ch byŭ kiraŭnikom parlamantu, i maje ŭnikalny palityčny dośvied. Dobra papracavali supracoŭniki abłasnoha ŭpraŭleńnia milicyja. Paśla akcyi na stancyi metro Instytut Kultury aryštavany adzin z kiraŭnikoŭ Salihorskaha frontu Pavał Batujeŭ. Jaho ŭžo viazuć u Salihorsk, nie viartacca ž mašynie pustoj, padumali milicyjanty. Taksama aryštavanyja našyja maładziečanskija frontaŭcy, Volha i Jan Łahvinovičy, a taksama Maryna Najdzič. Ich viazuć u Maładečna, dzie, vidać, adbudziecca sud. Dla mianie heta dvojčy niepryjemna, bo ja try hady kiravaŭ Mienskaj abłasnoj arhanizacyjaj Partyi, i aryštoŭvajuć ludziej, najbolš blizkich da mianie».

Post crazycat_meyr ź vinšavańniami biełarusaŭ z Dniom Voli staŭ adnym z najbolš papularnych i abmiarkoŭvanych na rasiejskaj supołcy ru_politics . Na dadzieny momant jon užo naźbiraŭ 360 kamentaroŭ. Siarod ich jak absalutna stanoŭčyja, tak i jaskrava šavinistyčnyja. Pa abmierkavańni pasta možna mierkavać, što jašče daloka nia ŭsie ŭ Rasiei zvyklisia z faktam biełaruskaj niezaležnaści.

• 0
• 0
• 0
• 0
• 0
• 0
• 0
• 0