«Sovietskaja Biełoruśsija» źvinavaciła pasła Eryksana ŭ viedańni biełaruskaj movy
«Šviecyja prajaŭlaje niezrazumiełuju aktyŭnaść na biełaruskim kirunku».
Kałumnist «SB» Uładzisłaŭ Šymaŭ u śviežym numary vydańnia razvažaje pra mahčymyja pryčyny «avijacyjnaj pravakacyi». Jon ličyć, što «pravakacyja ŭdałasia» i što heta «tryvožny zvanok, da jakoha varta pastavicca z maksimalnaj surjoznaściu». Pry hetym Šymaŭ padkreślivaje, što padobnyja pravakacyi — nie redkaść.
U jakaści prykładaŭ jon pryvodzić źbity ŭ 1983 hodzie karejski «Boinh» i pryziamleńnie Rusta na Krasnaj płoščy ŭ 1987 hodzie. «Dahetul da kanca nie zrazumieła, što heta było: trahičny źbieh abstavinaŭ abo tonka raźličanaja pravakacyja»,— razvažaje Šymaŭ pra historyju z karejskim samalotam.
«Plušavuju bambardziroŭku» Šymaŭ ličyć «častkaj infarmacyjnaj vajny jeŭrapiejcaŭ suprać biełaruskaha kiraŭnictva i robić akcent na aŭtarstvie akcyi.
«Šviecyja prajaŭlaje na pieršy pohlad niezrazumiełuju aktyŭnaść na biełaruskim nakirunku. Vielmi niezvyčajnaja fihura šviedskaha pasła spadara Eryksana, jaki vałodaje biełaruskaj movaj i aktyŭna jaje vykarystoŭvaje. Užo adno heta źjaŭlajecca jarkim śviedčańnie pavyšanaj cikavaści Šviecyi da Biełarusi», — piša Šymaŭ.
Dalej jon adznačaje aŭtarstva Šviecyi ŭ stvareńni prahramy «Uschodniaha partniorstva». «I kali intares Polščy tut dastatkova vidavočny, to zdavałasia b, pry čym tut dalokaja Šviecyja?» — zadaje pytańnie Šymaŭ i tut ža daje adkaz. Na jaho dumku, manalitnaść Jeŭrapiejskaha Sajuza mocna pierabolšanaja, a vialikija jeŭrapiejskija dziaržavy praciahvajuć vieści davoli samastojnuju zamiežnuju palityku. Da takich dziaržaŭ Šymaŭ adnosić i Šviecyju, jakuju charaktaryzuje jak dziaržavu z «daŭnimi impierskimi tradycyjami». Na jaho dumku, paśla Paŭnočnaj vajny Šviecyja straciła šaniec na daminavańnie ŭ rehijonie i niekalki stahodździaŭ pavodziła siabie «nižej travy».
«Adnak impierskaje minułaje nie źnikaje bieź śladoŭ, i siońniašniaja hieapalityčnaja situacyja daje šviedskim hieapalityčnym ambicyjam novy šaniec», śćviardžaje Šymaŭ. Maŭlaŭ Polšča, Rasija i Hiermanija ŭžo nie tyja, što raniej.
Nahadajem, što aficyjna fakt pralotu šviedskaha samalota nad Biełaruśsiu Alaksandr Łukašenka paćvierdziŭ praz 22 dni paśla incydentu. Da hetaha času Minabarony nieadnarazova abviarhała hety fakt. Nazyvali jaho hrubaj pravakacyjaj i falšyŭkaj.
Ciapier čytajuć
«My kidali kamiani, kab jany nie ŭźlatali». Adnym z tych, chto sprabavaŭ spynić drony, što vylatali z fur, byŭ biełarus Anton38
Kamientary