Što pakaža niezaležnaje TV "Biełsat"

Pačatak viaščańnia pieršaha ŭ historyi niezaležnaha spadarožnikavaha televizijnaha kanału zaplanavany na vosień.

Viaščańnie budzie ładzicca z terytoryi Polščy. Hałoŭnaja zadača kanału — zabiaśpiečyć biełarusaŭ niezaležnaj i abjektyŭnaj infarmacyjaj. Pavodle zadumki stvaralnikaŭ, kanał nia budzie prapahandyscki — prapahandy ź liškam chapaje na biełaruskich «knopkach». Zamiest taho, pavodle kancepcyi «BIEŁSAT», telehledačom buduć prapanavanyja cikavyja i vartyja davieru prahramy.

Asnoŭnaja mova viaščańnia — biełaruskaja. Na rodnaj movie buduć havaryć usie žurnalisty i viadoŭcy novaha telekanału. Adnak kali hość u studyi ci surazmoŭca žurnalista zachoča adkazvać pa‑rasiejsku — jahonych słovaŭ pierakładać na biełaruskuju nia buduć.

Na pieršym etapie «BIEŁSAT» budzie viaščać 15 hadzinaŭ na sutki, a ŭ etery kanału budzie 17 ułasnych prahramaŭ.

Dziesiacichvilinavyja «Naviny dnia» planujecca rychtavać štodnia. Vychodzić jany buduć a 17.00. Paśla hetaha prahrama budzie paŭtaracca praz kožnyja try hadziny. Naviny buduć hruntavacca na videamateryjałach, atrymanych ź Biełarusi, ale zapisvacca ŭ studyi ŭ Varšavie.

Prahrama «Biełaruś, Biełaruś» — heta hałoŭnaja štotydniovaja prahrama, jakaja prezentuje mierkavańni dy acenki ekspertaŭ. Zapisvacca jana budzie ŭ Biełastoku ci ŭ Varšavie i praduhledžvaje zaprašeńnie haściej u studyju.

«Ahlad niezaležnaje presy» — štodzionnaja prahrama, zasnavanaja na materyjałach biełaruskich niedziaržaŭnych ŚMI. Aproč taho, u ahlad uklučać i materyjały pa našaj krainie, apublikavanyja ŭ viadučych suśvietnych vydańniach. U ramkach prahramy praduhledžanyja naŭprostavyja ŭklučeńni z redakcyjaŭ biełaruskich srodkaŭ masavaj infarmacyi, karotkija interviju z haśćmi studyi.

Jašče adna prahrama — «Pad znakam Pahoni» — prahrama pra historyju Biełarusi. U jaje asnovu lahuć małaviadomyja fakty biełaruskaj historyi. Materyjały dla prahramy buduć zdymacca biespasiarednie ŭ našaj krainie.

«Niezaležnaja scena» prezentuje telehledačam biełaruskich artystaŭ, jakija z roznych pryčynaŭ pazbaŭlenyja mahčymaści źjaŭlacca na biełaruskich dziaržaŭnych kanałach. U prahramie hučaćmie roznaja muzyka — ad narodnaj da roku.

«Biełaruski anderhraŭnd» prezentuje biełaruskich dziaječoŭ kultury, jakija žyvuć i pracujuć za miažoj, «My adsiul» raspaviadzie pra roznyja kutki Biełarusi, paznajomić ź ichnymi žycharami, a «Chto jość chto ŭ Biełarusi?» — pra vybitnych asobaŭ u ajčynnym sacyjalnym, kulturnym i palityčnym žyćci.

Aproč taho, u etery «BIEŁSAT» buduć takija prahramy, jak «Hość tydnia», «Studenckaja dumka», «Na miažy» dy inš. Taksama ŭ etery buduć demanstravacca mastackija dy dakumentalnyja filmy, stvoranyja ŭ Biełarusi, Polščy dy inšych krainach.

Na žal, pahladzieć novy kanał zdolejuć tolki ŭładalniki spadarožnikavych antenaŭ. Adnak, pavodle daśledavańniaŭ, što ładzilisia stvaralnikami «BIEŁSAT», ichny lik tryvała raście. Siońnia spadarožnikavym telebačańniem krystajuć 7,2% žycharoŭ Biełarusi (u 2003 h. — tolki 1%).

• 0
• 0
• 0
• 0
• 0
• 0
• 0
• 0