Kyrhyzstan patrabuje ad Biełarusi vydać Žanyša Bakijeva

Ministerstva zamiežnych spraŭ Kyrhyzskaj Respubliki nakiravała biełaruskim kaleham vierbalnuju notu «ab pryniaćci vyčarpalnych mier pa bolš chutkim zatrymańni hramadzianina Bakijeva Žanyša Salijeviča i nastupnaj jaho ekstradycyi ŭ Kyrhyzskuju Respubliku». Pra heta paviedamlaje Upraŭleńnie infarmacyi, druku i kultury Ministerstva zamiežnych spraŭ KR.

Infarmacyja ab znachodžańni brata byłoha prezidenta Kyrhyzstana ŭ Minsku źjaviłasia ŭ ŚMI 17 žniŭnia. Paćviardžeńniem stali apublikavanyja fotazdymki, zroblenyja hramadskim dziejačam Michaiłam Paškievičam.

Paviedamlajecca, što nota była pieradadzienaja pasłu Respubliki Biełaruś u Kyrhyzskaj Respublicy V. Dzienisienku namieśnikam ministra zamiežnych spraŭ Kyrhyzstana A. Biešymavym 21 žniŭnia, piša Viečiernij Biškiek.

Jak paviedamlałasia raniej, 17 žniŭnia ŭ centry biełaruskaj stalicy, na vulicy Marksa byŭ zaŭvažany čałaviek, padobny da Džanybieka Bakijeva, brata zrynutaha prezidenta Kyrhyzstana. Fota apublikavaŭ na svaim akaŭncie ŭ Fejsbuku Michaś Paškievič. Jak adznačyŭ aŭtar fota, hety čałaviek u supravadžeńni ziemlakoŭ špacyravaŭ niedaloka ad kaviarni «Hrunvald». Jaho spadarožnikam nie padabałasia, što ich fatahrafujuć. Prysutnaść Džanybieka ŭ Biełarusi asprečvałasia jaho bratam i nie paćviardžałasia na aficyjnym uzroŭni.

Dziejny prezident Kyrhyzstana Ałmaźbiek Atanbajeŭ nazvaŭ Džanybieka «strašnym čałaviekam».

Pavodle jaho słovaŭ, mienavita Džanybiek padčas krasavickich padziej 2010-ha kiravaŭ rasstrełam demanstrantaŭ, pryčym daŭ snajpieram zahad calać u hałavu i ŭ hrudzi. U krasaviku 2010 hoda ŭ Kyrhyzstanie adbyŭsia dziaržaŭny pieravarot.

Padčas šturmu budynka ŭrada ŭ Biškieku i dalejšych biesparadkaŭ zahinuli kala 90 čałaviek i 1,5 tysiačy byli paranienyja.

Na toj momant prezident Bakijeŭ, jaho brat Žanyš (Džanybiek), jaki ŭznačalvaŭ Słužbu dziaržachovy krainy i starejšy syn Marat źbiehli z krainy. Na radzimie jany byli zavočna abvinavačanyja ŭ masavym zabojstvie, źviazanym ź pieravyšeńniem słužbovych paŭnamoctvaŭ, i abjaŭlenyja ŭ mižnarodny vyšuk. Kurmanbiek Bakijeŭ prybyŭ u Biełaruś 19 krasavika 2010 hoda pavodle zaprašeńnia Alaksandra Łukašenki.

Hienprakuratura Kyrhyzstana dvojčy źviartałasia ŭ Hienprakuraturu Biełarusi z zapytam pra vydaču Bakijeva i dvojčy atrymała admovu. 17 kastryčnika 2011 hoda staršynia Dziaržkamiteta nacbiaśpieki Kyrhyzstana Kieniešbiek Dušabajeŭ, adkazvajučy na pytańni deputataŭ parłamienta, paviedamiŭ, što Kurmanbiek Bakijeŭ atrymaŭ u Biełarusi palityčny prytułak. MUS Biełarusi nie raskryvaje status Bakijeva.

• 0
• 0
• 0
• 0
• 0
• 0
• 0
• 0