Biełaruski pasoł u Biškieku: Bakijeŭ byŭ fotašopam

Pasoł Biełarusi ŭ Kyrhyzstanie Viktar Dzienisienka sustreŭsia ź lidarami hramadskich abjadnańniaŭ «Ajkoł Ała-Toa» i «Miekien šeitery», što pravodziać mitynh kala budynka biełaruskaha pasolstva ŭ Biškieku, i namieśnikam ministra zamiežnych spraŭ Kyrhyzstana Askaram Biešymavym, jaki prybyŭ na miesca padziej.

Jak paviedamlaje infarmahienctva www.24.kg sa spasyłkaj na sustaršyniu «Miekien šeitery» Arstanbieka Sahyndykava, padčas sustrečy Dzienisienka zajaviŭ, što pasolstva Biełarusi ciesna supracoŭničaje z MZS Kyrhyzstana. «Było abiacana, što ciapier kožnyja try dni dypłamaty buduć sustrakacca z Askaram Biešymavym i praź jaho paviedamlać, na jakoj stadyi znachodzicca vyrašeńnie spravy pa ekstradycyi Bakijevych. My vyrašyli im dać čas, usio roŭna za adzin dzień Bakijevych nie zmohuć pryvieźci. Mitynhoŭcy razychodziacca», — raskazaŭ hramadski aktyvist.

Treba adznačyć, što čatyry dni tamu pasoł Biełarusi ŭžo sustrakaŭsia z členami «Ajkoł Ała-Toa» i «Miekien šeitery», jakija mitynhavali kala budynka pasolstva. Tady Dzienisienka abvierh infarmacyju ab znachodžańni Žanybieka Bakijeva ŭ Biełarusi.

«Jon zapeŭnivaŭ nas, što fotazdymki, raspaŭsiudžanyja ŭ internecie, nie bolš jak fotašop», — skazaŭ žurnalistam Sahyndykaŭ.

Siońnia, pavodle jaho słoŭ, da pratestantaŭ na praciahu troch hadzin nichto nie vychodziŭ. «Mitynhoŭcy, razzłavaŭšysia, zakidali kamianiami budynak: raźbili šyby budynka pasolstva», — rastłumačyŭ hramadski aktyvist učynki ŭdzielnikaŭ akcyi.

Jak paviedamlałasia raniej, ranicaj 28 žniŭnia na pasolstva Biełarusi ŭ Biškieku napad učynili svajaki achviar dziaržaŭnaha pieravarotu 2010 hoda, jakija patrabujuć ekstradycyi ź Minska skinutaha prezidenta Kurmanbieka Bakijeva i jaho brata Žanybieka. Bakijevy abvinavačvajucca va ŭčynieńni ciažkich kryminalnych złačynstvaŭ. Udzielniki akcyi patrabujuć spynieńnia pracy pasolstva i razryvu dypadnosin z uładami Biełarusi, jakija «chavajuć zabojcaŭ». Mitynhoŭcy patrabujuć, kab da ich vyjšaŭ pasoł.

Siońnia ž ranicaj u biełaruskaje MZS byŭ vyklikany časovy pavierany ŭ spravach Kyrhyzstana.

«Jon kateharyčna papiaredžany ab niedapuščalnaści pravakacyjnych dziejańniaŭ, jakija staviać pad pahrozu dziejnaść dypłamatyčnaha pradstaŭnictva i jaho supracoŭnikaŭ. Biełaruski bok zapatrabavaŭ zabiaśpiečyć nadziejnuju achovu pasolstva», — paviedamiŭ pres-sakratar MZS Andrej Savinych.

24 žniŭnia Kyrhyzstan adklikaŭ ź Biełarusi svajho pasła. Nahodaj dla dypłamatyčnaha kanfliktu stali vykładzienyja ŭ internet fatahrafii brata eks-prezidenta Žanybieka Bakijeva, jaki adšukvajecca Interpołam. Jon byŭ sfatahrafavany kala ŭvachodu ŭ kafe «Hrunvald» u centry Minska. MZS Kyrhyzstana ŭručyła vierbalnuju notu pasłu Biełarusi ŭ Biškieku, u jakoj vykazała ździŭleńnie i zakłapočanaść u suviazi z publikacyjami ŭ ŚMI fatahrafij Žanybieka Bakijeva, byłoha kiraŭnika Słužby dziaržaŭnaj achovy respubliki, što paćviardžajuć jaho znachodžańnie na terytoryi Biełarusi.

MZS Kyrhyzstana nahadała biełaruskamu boku, što Bakijeŭ znachodzicca ŭ mižnarodnym vyšuku, u tym liku pa linii Interpoła, pavodle abvinavačvańnia ŭ asabliva ciažkich złačynstvach. Kirhizski bok spadziajecca, što aficyjny Minsk «prymie ŭsie vyčarpalnyja miery pa nieadkładnym zatrymańni i ekstradycyi Žanybieka Bakijeva ŭ Kyrhyzskuju Respubliku ŭ miežach dziejnych mižnarodnych dahavoraŭ, udzielnikami jakich źjaŭlajucca jak Kyrhyzstan, tak i Biełaruś», zajaviŭ 27 žniŭnia ŭ Minsku pradstaŭnik kirhizskaha pasolstva.

U krasaviku 2010 hoda ŭ Kyrhyzstanie adbyŭsia dziaržaŭny pieravarot, u vyniku jakoha ŭłada pierajšła ŭ ruki časovaha kaalicyjnaha ŭrada, što składajecca ź lidaraŭ apazicyjnych partyj. Pry hetym zahinuli prykładna 90 čałaviek, amal tysiaču atrymali ranieńni. Eks-prezident Kurmanbiek Bakijeŭ, jaho brat Žanybiek, syn Marat, a taksama inšyja nabližanyja zavočna byli abvinavačany ŭ masavym zabojstvie, spałučanym ź pieravyšeńniem słužbovych paŭnamoctvaŭ, i abvieščany ŭ mižnarodny vyšuk. Akramia taho, Žanybiek Bakijeŭ abvinavačany ŭ arhanizacyi zabojstva kiraŭnika administracyi prezidenta Miedeta Sadyrkułava.

Kurmanbiek Bakijeŭ ź nieaficyjnaj žonkaj i dvuma dziećmi prybyŭ u Biełaruś 19 krasavika 2010 hoda pavodle asabistaha zaprašeńnia Alaksandra Łukašenki. Novyja ŭłady Kyrhyzstana nieadnarazova źviartalisia ŭ Hienprakuraturu Biełarusi z prośbaj vydać Bakijeva, ale atrymlivali admovu. Pavodle mierkavańnia biełaruskaha boku, pravavych padstaŭ dla zadavalnieńnia prośby ab vydačy Bakijeva niama.

• 0
• 0
• 0
• 0
• 0
• 0
• 0
• 0