Pasoł Kyrhyzstana ŭ Biełarusi vyzvaleny ad pasady

Pasoł Kyrhyzstana ŭ Biełarusi Eryk Asanalijeŭ vyzvaleny ad zajmajemaj pasady. Kamitet pa mižnarodnych spravach kirhizskaha parłamienta na zakrytym pasiadžeńni słuchaje spravazdaču dypłamata ab pracy ŭ krainie znachodžańnia.

Ukaz ab źniaćci Asanalijeva z pasady pasła ŭ Biełarusi, Łatvii i Litvie i pastajannaha i paŭnamocnaha pradstaŭnika Kyrhyzskaj Respubliki pry Statutnych orhanach SND padpisany prezidentam Kyrhyzstana Ałmaźbiekam Atambajevym 3 vieraśnia, paviedamiła pres-słužba kiraŭnika dziaržavy. Pryčyna zvalnieńnia ŭ paviedamleńni nie ŭkazana.

Siońnia ž kamitet pa mižnarodnych spravach kirhizskaha parłamienta razhladaje ŭ zakrytym režymie spravazdaču dypłamata ab pracy ŭ krainie znachodžańnia, paviedamlaje infarmacyjnaje ahienctva 24.kg. Inicyjatyva zasłuchać takuju spravazdaču na zakrytym pasiadžeńni zychodziła ad deputata Haliny Skrypkinaj, jaje padtrymali inšyja členy kamiteta. Vyklučeńnie skłaŭ deputat ad frakcyi «Ata Žurt» Žyłdyzkan Džałdošava, jakaja zajaviła, što ŭtojvać ad naroda infarmacyju nielha.

***

Nahadajem, 24 žniŭnia ułady Kyrhyzstana adklikali ź Biełarusi pasła ź Minska. Heta adbyłosia paśla taho, jak u internet trapiŭ zdymak brata eks-prezidenta Žanybieka Bakijeva, jaki byŭ sfatahrafavany ŭ centry Minska. Kirhizski bok zapatrabavaŭ ad Minska zatrymańnia i ekstradycyi Žanybieka Bakijeva, jaki znachodzicca ŭ mižnarodnym vyšuku pa abvinavačańni ŭ asabliva ciažkich złačynstvach. Čakanaj reakcyi ź biełaruskaha boku nie było.

28 žniŭnia na pasolstva Biełarusi ŭ Biškieku byŭ učynieny napad, u budynku było raźbita škło. Dypmisiju atakavali svajaki achviaraŭ dziaržaŭnaha pieravarotu 2010 hoda, jakija patrabavali ekstradycyi Kurmanbieka i Žanybieka Bakijevych, abvinavačanych u masavych zabojstvach. Udzielniki mitynhu patrabavali spynieńnia pracy pasolstva i razryvu dypadnosin z uładami Biełarusi, jakija «chavajuć zabojcaŭ».

Pasoł Biełarusi ŭ Kyrhyzstanie Viktar Dzienisienka sustreŭsia ź mitynhoŭcami i paabiacaŭ infarmavać ich praz MZS Kyrhyzstana ab tym, jak vyrašajecca pytańnie ab ekstradycyi Bakijevych. Adnak praz dva dni na pres-kanfierencyi ŭ Biškieku jon vykazaŭ sumnieńnie adnosna praŭdzivaści fatahrafij Žanybieka Bakijeva, bo zdymak byŭ zrobleny pradstaŭnikom biełaruskaj apazicyi.

Ułady Biełarusi dahetul nie paćvierdzili fakt znachodžańnia ŭ Biełarusi Žanybieka Bakijeva.

Raniej Biškiek nieadnarazova źviartaŭsia da Minska z prośbaj vydać i samoha Kurmanbieka Bakijeva, jaki prybyŭ u Biełaruś 19 krasavika 2010 hoda pa asabistym zaprašeńni Alaksandra Łukašenki. Adnak Hienprakuratura Biełarusi admoviłasia vydavać Bakijeva, bo nie znajšła dla hetaha pravavych padstaŭ.

• 0
• 0
• 0
• 0
• 0
• 0
• 0
• 0