Bohuś Bijatlanionak. Łyžy z matorčykam

Łyžy z matorčykam

Pra toje, jak spartyŭnaja mafija zmahałasia ź biełaruskim bijatlanistam

Bijatlonnaja nadzieja biełarusaŭ Vadzim Sašuryn užo namazvaŭ svaje łyžy, kali sonca ŭzyjšło nad niamieckim miastečkam Rupoldynh, dzie zakančvaŭsia piaty etap Kubku śvietu pa bijatlonie. «Nie padmažaš — nie pajedzieš» — heta naš bijatlanist viedaje ź dziacinstva. Tym časam mižnarodnaja spartyŭnaja mafija ŭžo paśpieła zrabić svaju čornuju spravu. Na strelbiščy byli rasstaŭlenyja mahnitnyja pastki dla kulaŭ, padpilenyja łyžnyja pałki, źbity pryceł — karaciej, mafijozi pacirali ŭžo ruki ŭ čakańni čarhovaha fijaska biełaruskaha bijatlonu. Na hetaje vidovišča nie palenavalisia pryjści j tysiačy miascovych niamieckich abibokaŭ.

Tym časam pačałasia spryntarskaja honka na 10 kilametraŭ. Bijatlonny samarodak Biełarusi Vadzim Sašuryn, što startuje pad 29-m numaram, ź pieršych metraŭ nabiraje šalonuju chutkaść (vučyciesia padmazvać łyžy!). Na ahniavych rubiažach Vadzim dakładny. Mafijozi ŭ žachu — pałki ŭ Sašuryna nie łamajucca, mišeni zakryvajucca adna za adnoj. I voś jon upeŭniena finišuje dy zajmaje pieršy radok. Ale radavacca jašče rana — na druhim kancy stadyjonu ludzi ŭ cyvilnym dajuć ukazańni pradstaŭniku buržujskaj Niamieččyny Ryka Hrosu, što startuje pad 70-m numaram.

Niemiec užo za pieršaj jełkaj pačynaje zrazać kruhi dystancyi. Trenery dy pradstaŭniki mižnarodnych spartyŭnych instancyjaŭ zapluščvajuć na heta vočy. Całkam zrazumieła — usie srodki kinutyja na toje, kab pieraškodzić biełarusu zaniać pieršaje miesca.

Dalej — bolej. Na pieršym ahniavym rubiažy Hros zdymaje ź plača nie zvyčajnuju vintoŭku, a sapraŭdny bajavy aŭtamat z mahazynam nie na piać, a na piaćdziasiat patronaŭ. Nia dziva, što paśla praciahłaj čarhi ŭsie mišeni zakryvajucca. Ale ŭsio roŭna čas u Sašuryna značna lepšy. I tut niemiec advažvajecca na nieprykryty «muchlož». Zamiest taho, kab sumlenna admachać dva z hakam kilametry pierad druhoj stralboj, nachabny niamčura abychodzić stadyjon kustami dy znoŭ źjaŭlajecca na strelbiščy. Niameckija fanaty, paraziaŭlaŭšy raty ad takoj pryjemnaj niečakanaści, sustrakajuć prajdziśvieta hučnymi vopleskami. Ryka Hros ustaŭlaje novy mahazyn dy stralaje «na ździŭleńnie» dakładna. Mafijozi ŭzdychajuć z palohkaj — paśla druhoj stralby Hros na 1,7 sekundy apiaredžvaje Sašuryna. Ale niamieckija trenery zaniepakojenyja - jany dobra ŭśviedamlajuć, što takoj mizernaj pieravahi niedastatkova, kab adčuvać siabie spakojna. Niaščasnych niemcaŭ prašyb chałodny pot — jany ŭjavili, jak ź imi žorstka raspraviacca, kali na vierchniaj prystupcy pjedestału budzie ŭsio ž biełarus. Što ž rabić?! I tut u hałovach sprytnych na vydumki pradstaŭnikoŭ Dojčlandu pramilhnuła vyratavalnaja dumka. Łyžy z matorčykam!..

...Na finiš Ryka Hros pryjechaŭ ź lepšym časam. Usie zadavolena dy chitra ŭśmichalisia, tolki biełaruskaja kamanda była zabitaja horam. U toj ža dzień usie telekanały buržuaznaha śvietu trubili pra bliskučuju pieramohu niemca dy pra «dasiahnieńnie» biełarusa.

P.S. Heta ŭžo čaćvierty srebny medal Sašuryna ŭ rozyhryšu Kubku śvietu hetaha sezonu. Budziem spadziavacca, takaja doŭhaja čarada niaŭdačaŭ nie adabjecca na psychalahičnym stanie Vadzima, i jon abduryć spartyŭnuju mafiju dy zavajuje narešcie «zołata».

Bohuś Bijatlanionak