Naviny

 Naviny

Zahinuŭ Mikoła Jermałovič

Pazaŭčora ŭviečary jon jechaŭ z Čyrvonaha kaścioła j pad voknami svajho domu trapiŭ pad mašynu. Učora pamior. Tydzień tamu my nadrukavali ź im vialikuju hutarku. Było jamu 78 hadoŭ, byŭ jon amal ślapy z malenstva, zaciata baraniŭ praŭdu pra biełaruskuju historyju, rychtavaŭ novuju knihu. Usio za žyćcio vytrymaŭ. Jon adzin supraćstajaŭ cełamu savieckamu Instytutu historyi.

Viečnaja pamiać.

Pryhody Drančuka

1 sakavika kala rezydencyi prezydenta ŭ Miensku adbyŭsia niesankcyjanavany pikiet. Cimoch Drančuk, Pilip Klikušyn i Lavon Małachaŭ trymali plakaty z patrabavańniem nieadkładna raśśledavać źniknieńnie V.Hančara, Ju.Zacharanki i A.Krasoŭskaha. Usich udzielnikaŭ pikietu zatrymali i zavieźli ŭ pastarunak. Cudździa Ždanok dała ŭsim trom chłopcam 5 načej aryštu. Ale Cimocha Drančuka musili ŭčora adpuścić, bo ŭ jaho pryznali čerapna-mozhavuju traŭmu. Nanieśli jaje jamu pry pieravozcy z sudu na Pryłuki — jaho pasadzili ŭ vialikaje adździaleńnie aŭtazaku, «stakan», dzie zamiest vaśmioch pieravozili 18 paniavolenych, i tam jon pabiŭsia hałavoj. Dva ž druhija chłopcy tak i siadziać, i trymajuć haładoŭku — vyjduć jany 8 sakavika. Ich nia tak daŭno ŭžo zatrymlivali za taptańnie rasiejskaha ściahu ŭ znak pratestu suprać bojni ŭ Čačenii. U Drančuka ž heta ŭžo čaćviertaja adsiedka. Adčuvaje jon siabie pa vychadzie na svabodu narmalna.

B.T.

Specnazaviec zabiŭ amonaŭca

Incydent adbyŭsia ŭ noč na minułuju subotu na načnoj dyskatecy ŭ kancertnaj zali «Miensk», — paviedamiŭ Interfaks. Supracoŭnik specpadraździaleńnia pa baraćbie z teraryzmam «Ałmaz» strełam ź pistaleta zabiŭ supracoŭnika mienskaha amonu i paraniŭ jašče troch aficeraŭ atradu asobaha pryznačeńnia HUUS stalicy. Zabojcu zatrymali.

A.K.

Varjat — varjata

Žudasny vypadak adbyŭsia ŭ varjatni, jakaja znachodzicca ŭ vioscy Haradzišča kala Pinsku (na miescy Haradzišča mieściŭsia staražytny Pinsk). Starejšy medbrat u šalenstvie zastreliŭ psychična chvoraha z palaŭničaj strelby. Kali zabojcu zatrymlivali, jon supraciŭlaŭsia milicyjantam.

Alaksiej Dzikavicki, Pinsk

Ružy — poštaj

Paštovaja słužba Biełarusi zrabiła jašče adzin krok napierad. Napiaredadni 8 sakavika paštaviki paviedamili, što ciapier možna dasłać žančynam razam ź vinšavalnaj paštoŭkaj kvietki ci padarunki. Pošta abiacaje dastavić usio ŭ termin.

Symon Hłazštejn

Zdaroŭje Silivončyka

28 lutaha śvietłahorski sud pryznačyŭ psychijatryčnuju ekspertyzu A.Silivončyka, mecenata sibirskich archaraŭcaŭ. Nastupnaje pasiedžańnie — 6 sakavika. Ludzi pavodzinami Silivončyka na sudzie aburajucca, ale sioj-toj kaža: a kab ciabie 8 miesiacaŭ pratrymali ŭ kamery, jak by ty siabie pavodziŭ?

Vadzim Bołbas, Śvietłahorsk

Na papiery ŭsio vyjdzie

Na Paleśsi ŭłady planujuć dy prahnazujuć «raźvićcio narodnaj haspadarki» na 2000 hod. Prykładam, na Stolinščynie vertykalščyki abvieścili, što ŭ biahučym hodzie charčovaja pramysłovaść budzie raźvivacca «apieradžalnymi tempami», a pradukcyjnaść pracy ŭzraście dakładna na 11,8%! Vielmi chutka, peŭna, nieviadomymi dahetul u śviecie tempami, budzie raźvivacca sielskaja haspadarka — «vałavaja vytvorčaść sielskahaspadarčaj pradukcyi va ŭsich katehoryjach uzraście na 20,5%».

U Darahičynskim rajvykankamie pajšli jašče dalej. Tam planujuć pavialičyć vytvorčaść ziernia na 24%, ilnovałaknu — na 89%, bulby — na 44%! Pavodle dakładu namieśnika staršyni Darahičynskaha rajvykankamu Sieńkaŭca na sesii rajonnaha Savietu deputataŭ, «pracaŭniki vioski abaviazanyja atrymać z kožnaha hiektaru pasievaŭ 23,4 centnery zbožža, 235 c cukrovych burakoŭ» i h.d.

Darafiejevaj nia treba

U cubotu ŭ Pinsku admianili kancert Iryny Darafiejevaj. Nie dapamahli navat pryhožyja kalarovyja postery, raźviešanyja napiaredadni — pinčuki nabyli tolki 20 kvitkoŭ pry bolš jak 700 miescach u DK. A voś 8 sakavika ŭ Pinsku musiać vystupić «Siabry», dyk kvitkoŭ uvohule niama ŭ prodažy — «uvachod pa zaprašeńniach».

Alaksiej Dzikavicki, Pinsk

Tydzień biez «Małyša»

Bolš za tydzień na palicach astravieckich kramaŭ adsutničaje dziciačaje charčavańnie «Małyš» i «Malutka», jakoje vyrablajecca na vaŭkavyskim AT «Biełłakt». Pradaŭcy ich źniknieńnie tłumačać prosta — tanny pradukt vyvieźli ŭ Litvu i «navaryli» niemałyja hrošy pradprymalnyja ludzi. Maciarok heta nie supakojvaje, bo impartnaha dziciačaha charčavańnia ŭ Astraŭcy, jak kažuć, sa śviečkaju nia znojdzieš.

Marjan Vianhroŭski, Astraviec

Z Šarkoŭščyny

U Šarkoŭščynskim rajonie dziejničaje 6 hramadzkich arhanizacyjaŭ. Pierarehistracyju ź ich prachodzili tolki TBM i kulturna-aśvietnicki centar imia Jazepa Drazdoviča. Nia tak ciažka było prajści pierarehistracyju, jak stać na ŭlik. U rajvykankamie patrabavali arendavać pamiaškańnie pad ofis, kab arhanizacyi byli pastaŭlenyja na ŭlik. Ale kiraŭniki miascovych ustanovaŭ byli papiaredžanyja nie davać pamiaškańniaŭ. Paru miesiacaŭ arhanizacyi «visieli ŭ pavietry», pakul nie pryjšoŭ zahad źvierchu: možna skarystoŭvać u jakaści jurydyčnaha adrasu chatnija adrasy siabroŭ arhanizacyi. 28 lutaha TBM i kulturna-aśvietnicki Centar Drazdoviča byli pastaŭlenyja na ŭlik.

Ź Dzisienščyny

Na Dzisienščynie prajšoŭ plener mastakoŭ mienskaj supołki «Pahonia» i «Viciebskaj akvareli», a taksama navučencaŭ mastackich škołaŭ Viciebščyny, pryśviečany Jazepu Drazdoviču i Michasiu Rajčonku. Vynikam sustrečy stalisia mastackija vystavy ŭ Viciebsku, Šarkoŭščynie i Hałubičach.

B.T.

Kraj

Voś užo druhi tydzień u Marjinaj Horcy źjaŭlajucca ŭlotki vajenizavanaha zhurtavańnia «Kraj». Ulotki zaklikajuć lubić Biełaruś nie na słovach, a spravami.

M.Vuž, Marjina Horka

pravasłaŭnaja kronika

Vystava ŭ DK MAZu

U mienskim DK MAZu raspačałasia fotavystava «Biełaruś Pravasłaŭnaja». Siabry Bractva imia Archistraciha Michaiła za 2 hady vandrovak pa krainie naźbirali kala 600 zdymkaŭ, što ilustrujuć admietnaści biełaruskaha pravasłaŭja. Ź vieraśnia 1999 hodu vystava pabyła ŭ 17 haradach krainy.

Sabor u Lidzie

U Lidzie planujuć pabudavać pravasłaŭny katedralny sabor na vuł.Tuchačeŭskaha ŭ honar 2000-hod́dzia naradžeńnia Chrystovaha. Tam uračysta zakłali kamień, jaki aśviaciŭ japiskap Navahradzki j Lidzki Hury. Niadaŭna na hetaj ža vulicy pabudavali j kaścioł.

Adbudova Ŭvaskrasienskaj carkvy

Viciebskaja pravasłaŭnaja japarchija atrymała dazvoł haradzkich uładaŭ na adbudovu zrujnavanaj u 1936 hodzie Ŭvaskrasienskaj carkvy. Fundataram adnaŭleńnia pomnika poźniaha baroka budzie dyrektar abutkovaha pradpryjemstva «Marka» Mikoła Martynaŭ. Haradzkaja ŭnijackaja hramada patrabuje pierahladu hetaha rašeńnia i pieradačy prava na rekanstrukcyju carkvy ŭnijatam — bo budavaŭsia hety sabor u svoj čas mienavita ŭnijatami.

B.T.