Naviny
Budzie ŭ Połacku Śviataja Hanna
Mer Połacku Ŭładzimier Tačyła ŭ hazecie «Połacki vieśnik» prapanavaŭ uznavić kaścioł Śv.Hanny. Reštki hetaha chramu zachavalisia la bernardynskich muroŭ. Hety kaścioł byŭ pabudavany u 1758 hodzie na levym bierazie Dźviny ŭ kompleksie bernardynskaha klaštaru. U 1832 hodzie rasiejskimi ŭładami klaštar byŭ skasavany, a kaścioł pieradadzieny pravasłaŭnaj carkvie. Chram, paśla niaznačnaj pierabudovy, pačaŭ nazyvacca carkvoju Ivana Bahasłova i dziejničaŭ jašče ŭ 20-ch hadoch, ale nieŭzabavie enkavedysty prystasavali pamiaškańni byłoha klaštara pad viaźnicu. Mienavita adsiul pačynaŭsia pakutnicki šlach dla dziasiatkaŭ tysiačaŭ žycharoŭ Połaččyny. Paśla druhoj suśvietnaj vajny žyłyja karpusy bernardynskaha klaštaru prydalisia pad psychijatryčnuju lakarniu, dzie jana mieścicca pa siońnia. Ruiny kaściołu Śv.Hanny – adzinaje śviedčańnie pra šmatlikija połackija kaścioły, jakija isnavali jašče napačatku XX st.
V.K., Połacak
Aniščanka syšoŭ z roku
Šmat chto z amataraŭ biełaruskaj maładziovaj muzyki viedaje navapałačanina Siarhieja Aniščanku. Muzyčnyja krytyki nia raz nazyvali jaho pačynalnikam ajčynnaj rok-muzyki.
Naprykancy 80-ch Anščanka stvaryŭ adzin ź pieršych biełaruskamoŭnych rok-hurtoŭ «Pošuk», na praciahu 90-ch peryjadyčna ładziŭ u Navapołacku rok-festyval «Rok-koła». Ale sioleta Siarhiej, tak by mović, źmianiŭ žanar — zaniaŭsia vyklučna duchoŭnaj muzykaj. Zdaryłasia heta paśla taho, jak jon dałučyŭsia da miascovaj ryma-katalickaj hramady. Razam z navapałačankaj Tacianaj Małuchinaj jon stvaryŭ duet i zapisaŭ kasetu relihijnych śpievaŭ «Carstva lubovi». Specyjalisty adznačajuć vysoki prafesijny ŭzrovień hetaj pracy.
29 žniŭnia ŭ Navapołackim centry nacyjanalnych kulturaŭ adbyŭsia kancert duetu Aniščanka—Małuchina. Muzyki ŭrazili svaim vykanańniem słuchačoŭ. Za niepraciahły čas jany stvaryli całkam novuju prahramu na paŭtary hadziny. Letam duet užo zrabiŭ niekalki vystupaŭ. U siaredzinie žniŭnia Aniščanka—Małuchina byli zaprošanyja ŭ Rosicu Vierchniadźvinskaha rajonu na ŭračystaści z nahody beatyfikacyi ajcoŭ-maryjanaŭ Antona Laščeviča i Jurja Kašyry.
Vasil Krokva, Połacak
Chram viarnuli z zabyćcia
Viciebskaja ziamla chavaje jašče šmat cikavaha dla daśledčykaŭ daŭniny. Sioleta padčas rekanstrukcyi staražytnych salanych składoŭ, što stajać na pravym bierazie Dźviny, budaŭniki natrapili na mohilnik i adkapali pareštki šaści čałaviek.
Heta ŭžo druhaja niečakanaja znachodka na miescy kolišnich salanych składoŭ. Čatyry hady tamu, vyvučajučy pomnik, viadomy daślednik viciebskaj spadčyny, archieolah Ihar Ciškin znajšoŭ padmurki nieviadomaha kultavaha budynku. Rosšuki ŭ archivach raskryli tajamnicu chramu.
Akazvajecca, na miescy salanych składoŭ u kancy XVI — pačatku XVII st. była pabudavanaja carkva Strečańnia. Pavodle chryścijanskaj tradycyi pobač z chramam byli zroblenyja mohiłki. Jak miarkujuć historyki, u siaredzinie XVII st. padčas hetak zvanaj rasiejska-polskaj vajny, chram byŭ razburany. Vierahodna, paśla žachlivych vajennych hadoŭ carkvu nie było kamu adnaŭlać. Parafijanie chutčej za ŭsio zahinuli abo byli vyviezienyja ŭ rasiejski pałon.
Ruiny Strečanskaj carkvy prastajali da pieršaha padziełu Rečy Paspalitaj. Nieŭzabavie paśla dałučeńnia Viciebsku da Maskovii, rasiejskaja administracyja vykupiła ŭ haradzkoha mahistratu reštki chrama z prylahajučaj ziamloj i pabudavała tut salanyja składy.
Na doŭhi čas pra isnavańnie carkvy zabylisia. Vypadkovyja znachodki viarnuli staražytny chram z histaryčnaha zabyćcia.
Juraś Ściapanaŭ
Unijaty ŭ Kastamałotach
Z 25 pa 31 žniŭnia na Padlaššy ŭ vioscy Kastamałoty na Buzie adbylisia rekalekcyi biełaruskich hreka-katalikoŭ. Tutaka ŭ stareńkaj cerkaŭcy Śv.Mikity dziejničaje ŭnijacki sanktuary – adziny ŭ Polščy. U Kastamałoty źjechalisia blizu 20 čałaviek – pradstaŭniki praktyčna ŭsich biełaruskich unijackich supołak. Udzielniki rekalekcyjaŭ zrabili pilihrymku ŭ susiedniaje miastečka Kodyń. U Kodyńskim kaściole, byłym unijackim chramie, zachoŭvajecca słavuty abraz Maci Božaj Cudatvornaj, jaki, zhodna ź lehiendaj, byŭ skradzieny mahnatam Vialikaha Kniastva Litoŭskaha Mikałajem Sapieham u Papy Rymskaha.
Vasil Krokva
Kamientary