Niazłosny dzień

 Niazłosny dzień

U Miensku na majoŭku ŭ park Horkaha sabrałasia z tysiaču čałaviek pad samymi strakatymi ściahami j lozunhami. Siarod ich byli j kandydaty ŭ prezydenty Ŭładzimier Hančaryk, Pavał Kazłoŭski j Siarhiej Kalakin.

Milicyjanty prosta na majoŭcy paabiacali pryciahnuć Kalakina da administracyjnaj adkaznaści za arhanizacyju niesankcyjanavanaha šeścia.

200 kamunistaŭ cieraz płošču Niezaležnaści prajšli da pomnika Leninu i ŭskłali kvietki. Na karotkim mitynhu ŭ parku vystupiŭ U.Hančaryk z zaklikam źmianić ekanamičnuju palityku dziaržavy.

U Homieli, jak paviedamlaje Radyjo Svaboda, na “aficyjnaj” majoŭcy niekalki rabočych uźniali pierad trybunaj vertykalščykaŭ plakaty antyŭradavaha źmiestu. Ivan Adamienka dastaŭ z torby plakat: «Damo Sašy 100 dalaraŭ, kab nie pieraškadžaŭ zarablać nam bolej», Anatol Papłaŭny — transparant z kalarovym fatazdymkam Alaksandra Łukašenki, vakoł jakoha viankom naleplenyja tysiačnyja kupiury staroha ŭzoru z podpisam: «Uładu — mnie, ziamlu — dyrektaram saŭhasaŭ, haleču — rabočym, pryhon — sialanam, padački — biudžetnikam, prava na pracu biaspłatna, prava na biznes za hrošy, chto nia zhodny — u turmu. Hałasujcie za mianie, atrymajecie da kanca stahodździa pa 100 dalaraŭ». Krychu dalej karespandent Radyjo Svaboda zaŭvažyŭ jašče dva padobnyja transparanty: «Cenam, jak u śviecie, — zarobki, jak u śviecie» i «Čykahskija rabočyja vyjšli na demanstracyju adzin raz i žyvuć dobra, a my?»

U Berlinie kala 6000 levakoŭ pabudavali barykady ŭva ŭschodnich pryharadach. Adnak bojki z palicyjaj mieli tolki lakalny charaktar, u adroźnieńnie ad minułaha hodu. U Londanie niekalki tysiačaŭ demanstrantaŭ levych pierakanańniaŭ ładzili kryvavyja bojki z palicyjaj na Oxford Street. Tysiačy iranskich rabočych kala parlamentu krainy pratestavali suprać biespracoŭja i napłyvu aŭhanskich i irackich imihrantaŭ. U Karačy ŭ Pakistanie demanstranty z demakratyčnych partyjaŭ patrabavali adstaŭki vajskovaha ŭradu. Palicyja razahnała ich, paraniŭšy z paŭsotni čałaviek. U Rasiei na majoŭki vyjšła až 1,5 miljony ludziej kamunistyčnych pierakanańniaŭ. U Jerevanie 10 tys. čałaviek vyjšli na mitynh, patrabujučy dałučeńnia Armienii da Sajuzu Rasiei j Biełarusi. U Sydnei i Melburnie manifestanty z čyrvonymi ściahami blakavali ŭvachody na biržy. Jany trymali plakaty: «Biaspłatnaja adukacyja», «Za patreby ludziej, proci skvapnaści karparacyjaŭ».

Hetkija mitynhi i demanstracyi rabočych i ludziej sacyjalistyčnych pierakanańniaŭ prajšli ŭva ŭsim śviecie.

U Osła adzin ź mitynhoŭcaŭ špurnuŭ tort u tvar ministru zamiežnych spravaŭ Narvehii Bjornu Jahlandu. Ale lider Rabočaje partyi abciorsia i praciahnuŭ šlach razam z kalonaju. Bo 1 traŭnia — dzień, u jaki pa-sapraŭdnamu nie złujuć, chiba što žartam.

Tolki na Filipinach uźniaŭsia ceły narodny bunt u abaronu byłoha prezydenta krainy, aktora Džozefa Estrady, adchilenaha ad ułady z pryčyny abvinavačańnia ŭ karupcyi. Demanstranty pasprabavali ŭziać šturmam prezydencki pałac. Palicyja, razhaniajučy šturmavikoŭ, zabiła try čałavieki. Katalickaja carkva arhanizuje ludziej na abaronu zakonnych uładaŭ krainy.

Mikoła