Jastrambielski pałac
Za 14 km na poŭdzień ad Baranavič znachodzicca staraśvieckaja vioska Jastrambiel. Niekali jana była centram vołaści, ciapier heta navat nia centar sielsavietu. Siarod susiednich viosačak jaje vyłučaje panskaja siadziba z pałacam.
Historyja majontku Jastrambiel, pačynajučy z XIX st., źviazanaja z Katłubajami – šlachieckim rodam tatarskaha pachodžańnia. Pieršym vaładarom siadziby z hetaha rodu byŭ Michał Katłubaj, rachunkavod Radziviłaŭskaj kamisii. Z 1864 h. majontkam vałodali syny Michała – Hienrych i Edvard (słynny historyk), jakija brali ŭdzieł u paŭstańni 1863—64 h. Kali Edvard pamior ad suchotaŭ, Jastrambiel pierajšoŭ da jahonaha syna Hienrycha, udzielnika rasiejska-tureckaj vajny, viadomaha vajskovaha lekara. Ź jahonaje inicyjatyvy ŭ Jastrambli j zakłali pałac. Dataj zbudavańnia ličycca 1897 h., paznačany na fluhiery zamkavaj viežy.
Paśla vajny ŭ zamku raźmiaścili škołu-internat dla sirotaŭ. Kab vyzvalić miesca dla łožkaŭ, razburyli kaflanyja piečy z vyjavami scenaŭ śviatoje j antyčnaje historyi. Ale, niahledziačy na ŭnutranyja razbureńni, zamak jašče hod dziesiać tamu zachoŭvaŭsia ŭ bolš-mienš prystojnym vyhladzie. Kali ž u 1989 h. pabudavali novy spalny korpus dla dziaciej, pałac, zhodna z rašeńniem Bieraściejskaha abłvykankamu, vyrašyli restaŭravać. Ale tady restaŭracyja skončyłasia ŭźviadzieńniem ryštavańniaŭ, jakija ŭ chutkim časie raskrali.
Niadaŭna restaŭracyju adnavili. Na hety raz sprava pajšła dalej: źziaje na soncy novaju blachaju dach, bialejuć “eŭravokny”. Inšaja reč, ci adpaviadaje ŭsio heta ahulnamu pieršapačatkovamu stylu pałacu.
Pałac – nie adzinaja słavutaść siadziby. Pabudovy atočanyja parkam, dzie rastuć redkija ŭ Biełarusi čyrvony dub, biełaja tapola, eŭrapiejskaja listoŭnica, vejmutavaja chvoja. Jość tam i aziarco – vialikaja łužyna, u jakoj płavaje mnostva plastykavych butelek.
Skroź zarosły dziadoŭnikam i krapivoj u čałaviečy rost, park nahadvaje začaravany les, a staražytny pałac – zamak miascovaha čaraŭnika, jaki prytuliŭ dzietak-sirotaŭ.
Ludmiła Huluk, Jastrambiel
Da Jastrambielskaha pałacu možna dajechać aŭtobusam“Baranavičy-Tuchavičy”, jaki adpraŭlajecca z Baranavickaha aŭtavakzału ŭ 9.30. Jechać patrebna da stancyi “Młynok” i zatym źviarnuć na darohu zhodna z ukazalnikam 2-3 km.
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii19
Kamientary