Atrymaj, Chusejnie, traktar

Atrymaj, Chusejnie, traktar

Čakańni Biełarusi i Iraku nie supadajuć

Cełych 6 dzion u Miensku znachodziłasia delehacyja Iraku na čale z namieśnikam premjer-ministra — ministram finansaŭ hetaj krainy Chikmatam al-Azavi. Napiaredadni mahčymaj vajny antyterarystyčnaj kaalicyi na čale z Amerykaj suprać režymu Sadama pieramovy z Azavi nabyvajuć złaviesnaje adcieńnie.

Aficyjnaj metaj irakcaŭ byŭ udzieł u pasiadžeńni biełaruska-irackaj kamisii pa handlova-haspadarčym supracoŭnictvie, sustrečy z Łukašenkam, Chvastovym, Prakapovičam, Miaśnikovičam i naviedvańnie “šerahu pradpryjemstvaŭ i arhanizacyjaŭ”. Temaj pieramovaŭ byŭ mahčymy ŭdzieł Biełarusi ŭ stvareńni zboračnaj vytvorčaści biełaruskich traktaroŭ na zavodzie ŭ Skanderyi, rekanstrukcyi zavodu škłatary ŭ Ramadzi, adnaŭleńni systemy vodazabieśpiačeńnia adnaho z kvartałaŭ Bahdadu, stvareńni zboračnaj vytvorčaści “MAZaŭ”.

Budavać zavody i navat pastaŭlać hruzaviki ŭ Irak Biełaruś moža tolki z dazvołu AAN, jakaja peryjadyčna kasuje niejkuju častku biełaruskich kantraktaŭ ź Irakam. Bo supracoŭnictva z Bahdadam ažyćciaŭlajecca ŭ ramkach prahramy “Nafta ŭ abmien na charčavańnie i medykamenty”, a embarha, uviedzienaje AAN suprać Iraku paśla vajny 1991 h., kali jon pasprabavaŭ zachapić susiedni Kuvejt, zastajecca ŭ sile. U cełym tavarazvarot ź Irakam u 2001 h. dasiahnuŭ 26093 tys. dalaraŭ i całkam składajecca z našaha ekspartu. Biełaruś pradaje Iraku traktary, hruzaviki, zapčastki, šyny.

Adnak, jak skazaŭ u Miensku iracki ministar, “my mahli b znajści inšyja vobłaści, aprača ekanomiki, kab raźvivać i ŭmacoŭvać našaje supracoŭnictva”. Na fonie zajavaŭ pradstaŭnikoŭ ZŠA, zakłapočanych infarmacyjaj pra toje, što biełarusy madernizavali systemu supraćrakietnaj abarony Iraku j rychtavali specyjalistaŭ dla absłuhoŭvańnia kompleksaŭ S-300, padobnyja namioki hučać šmatznačna. Lahična mierkavać, što na parozie vajny irakcy pryjechali havaryć zusim nie pra piŭnyja plaški. Niezdarma jany ciarpliva čakali, pakul Łukašenka vierniecca ź Insbruku, dzie jon tydzień kataŭsia na łyžach.

Były ministar zamiežnych spravaŭ Andrej Sańnikaŭ u interviju radyjo “Racyja” nia vyklučyŭ, što biełaruskija ŭłady prosta vykonvajuć rolu pasiarednika pamiž Irakam i Rasiejaj. Maskva, na dumku Sańnikava, nia choča peckać ruki i pieramaŭlacca z Bahdadam naŭprost. U časie apošnich vizytaŭ u Maskvu vice-premjera Iraku na vysokim uzroŭni nie prymali.

Vašynhton tym časam źbiraje siły dla ŭdaru pa Sadamie. Hetaj temie było pryśviečanaje turne vice-prezydenta ZŠA Čejni pa Blizkim Uschodzie. Łukašenka z ułaścivaj jamu bravadaj zajaviŭ u aŭtorak: “My kateharyčna suprać vajennaha cisku na Irak. A tym bolš suprać uzbrojenych atakaŭ”. Adnak pazycyja Miensku ŭ hetym vypadku nikoha ŭ śviecie nie cikavić. I ŭ Miensku heta razumiejuć. Hučnymi zajavami Łukašenka prosta sprabavaŭ kampensavać niesupadzieńnie čakańniaŭ Biełarusi i Iraku ad dvuchbakovych adnosinaŭ. Irak chacieŭ by bolš ščylnaje vajskova-techničnaje kaaperacyi ŭ roznych kirunkach. Biełaruś ža nie rašajecca na takuju ryzyku, bajučysia žorstkaje reakcyi Zachadu. Usio, na što hatovy Miensk, — prykryvać Maskvu ŭ jaje kantaktach z Bahdadam. Iści dalej za Rasieju Miensk nie hatovy. Zatoje ŭzamien za byccam by “asablivyja” adnosiny z bahdadzkim režymam-paryjem Miensk chacieŭ by zamacavacca na irackim rynku, ličačy jaho perspektyŭnym.

Vyhady ad supracoŭnictva ź Irakam dosyć sumnieŭnyja, zatoje sam fakt kantaktaŭ z samym adyjoznym arabskim dyktataram robić zamiežnuju palityku Łukašenki-Chvastova nadzvyčaj prystupnaju dla krytyki apazycyi. Praciahły vizyt Azavi paćvierdziŭ, što Biełaruś, tym nia mienš, nie hatovaja zamarozić suviazi z krainami-chulihankami. Tamu zastajecca naładzić ekspart “BiełAZaŭ” u Zymbabve, kab fakt utvareńnia suśvietnaje kaalicyi krainaŭ “sapraŭdy narodnaje demakratyi” možna było ličyć ździejśnienym.

Mikoła Buhaj