Dom dla deputataŭ

Dom dla deputataŭ

Centar Miensku, rajon stancyi metro “Pieršamajskaja”. Siarod daŭno nie ramantavanych “stalinskich” budynkaŭ Kazarmiennaha zavułku novy, jašče nia skončany 12-paviarchovik vyhladaje jak Huliver miž liliputaŭ: šykoŭnyja zašklonyja balkony, hihancki cokalny pavierch, zakrytyja raletami dźviery ŭ padziemny haraž...

Uzvodziła hety 144-kvaterny dom upraŭleńnie kapitalnaha budaŭnictva Kiraŭnictva spravami prezydenta. Praca pačałasia ŭ žniŭni 1999 h., paśla taho jak upraŭleńnie skončyła svoj papiaredni “abjekt” — vodahrazielakarniu ŭ sanatoryi “Baravoje” pad Mienskam. Ciapier, jak kaža načalnik upraŭleńnia Viačasłaŭ Panasiuk, budaŭnictva amal skončanaje. Zastalisia “sezonnyja” pracy, jakija ŭzimku nia zrobiš. Płošča kvateraŭ u domie bolšaja za siaredniuju. Dvuchpakajoŭka maje ahulnuju płošču ad 63 da 73 kv.m. Płošča čatyrochpakajovaj kvatery — 114 kv.m (razam ź vialikim balkonam z draŭlanymi naściłami na padłozie). Dom pabudavany tak, kab žychary pry nieabchodnaści mahli dosyć lohka pieraplanavać kvateru.

Hety dom byŭ pabudavany pa eksperymentalnych technalohijach — ź “ciopłymi” ścienami, jakija dazvalajuć lepiej zachoŭvać ciapło ŭ kvaterach u chałodnuju paru hodu. Ludzi kažuć, što ŭ cokalnym paviersie budzie basejn i trenažornaja zala. Ścieny domu składzienyja ź zielenavataha štučnaha kamieniu “beseru”. Materyjał hety vyrablajecca pa kanadzkaj technalohii na sumiesnym biełarusa-amerykana-kanadzkim pradpryjemstvie “Beser-Biełaruś”. Hety materyjał dazvalaje ekanomić na farbie: fasad novaha domu nie daviadziecca farbavać hadoŭ 20—30.

Aŭtar prajektu architektar Barys Školnikaŭ raspaviadać pra dom admoviŭsia: “U mianie jość zamoŭca, usie pytańni vyrašajcie ź im. Ja nijakich interviju na hety kont davać nia budu”. Dziŭnaja pazycyja — zvyčajna aŭtary achvotna kažuć pra svaje tvory. Čamu spadar Školnikaŭ nia choča havaryć pra budynak, jaki možna nazvać šedeŭram sučasnaje mienskaje architektury? Vidać, reč u tym, što z 72 zdadzienych kvateraŭ 38 zasialili deputaty pałaty pradstaŭnikoŭ nacyjanalnaha schodu. U cokalnym paviersie adnaho z padjezdaŭ na dźviarach słužbovaha pamiaškańnia visić šylda z paviedamleńniem, što tut mieścicca administracyja słužbovaha žytła PP NS. Namieśnik načalnika sakrataryjatu pałaty pradstaŭnikoŭ Mikałaj Skarynin paviedamiŭ “NN”, što na Kazarmiennym słužbovaje žytło atrymali tyja, chto dahetul nia byŭ uładkavany ŭ stalicy. Heta novaabranyja niamienskija deputaty druhoha składu PP NS. Astatnija pradstaŭniki rehijonaŭ (ich u pałacie niedzie tracina ad ahulnaj kolkaści) “matajuć” užo druhi termin i nahreć mieściejka ŭ Miensku paśpieli. Rešta čalcoŭ PP NS — mienčuki. Im słužbovaje žytło nia treba.

Chto budzie žyć u astatnich 106 kvaterach hetaha šykoŭnaha domu? Viačasłaŭ Panasiuk kaža, što dom uzvodziŭsia na ŭmovach dolevaha budaŭnictva. “U dolu” ŭvajšli Biełaruskaja čyhunka, abjadnańnie “Biełtelekam” i “fizyčnyja asoby”. Budaŭniki kažuć, što kvatery ŭ domie buduć nia tolki słužbovyja, ale i pryvatnyja: “Moža, buduć pradavać, a moža, užo j pradadzienyja ŭsie”. U mienskich ža ryełterskich firmach pra mahčymy prodaž kvateraŭ u hetym budynku ničoha nia čuli. Pryblizny sabiekošt takoha žytła aceńvajuć ŭ 500—550 dalaraŭ ZŠA za kvadratny metar. U siarednim pa Miensku hetaja ličba składaje 270—350 dalaraŭ za kv.m. U novym domie na vulicy Biełaruskaj, dzie kvatery pradajucca (heta niedaloka ad Kazarmiennaha zavułku), sabiekošt kvadratnaha metru siahaje 450 dalaraŭ. A jakaść domu na Kazarmiennym lepšaja, i miesca tut lepšaje. Vo ŭ jakim domie buduć žyć deputaty łukašenkaŭskaj pałaty pradstaŭnikoŭ.

Adam Voršyč