Telegram pieratvaryŭsia ŭ bieskantrolnuju zbroju ŭ rukach NATA, Ukrainy i terarystaŭ, a admova Durava ad supracoŭnictva z rasijskimi siłavikami stała pryčynaj hibieli ludziej. Adrazu niekalkich rasijskich vydańniaŭ vyjšli z vykryvalnymi artykułami suprać Paŭła Durava.
Vydańni sa spasyłkaj na materyjały FSB adznačajuć, što z 2022 hoda ŭ Rasii zarehistravana bolš za 153 tysiačy złačynstvaŭ, ździejśnienych z vykarystańniem miesiendžara Telegram, ź ich 33 tysiačy — dyviersijna-terarystyčna i ekstremisckija, uklučajučy arhanizacyju vybuchaŭ, padpałaŭ vajenkamataŭ i zabojstvaŭ.
Pavodle infarmacyi FSB, praz Telegram kaardynavaŭsia terakt u «Krokus Sici Chole» ŭ sakaviku 2024 hoda.
Pavodle źviestak FSB, vykarystoŭvajučy analityku miesiendžara, złamyśniki źbirali infarmacyju ab pieramiaščeńniach vysokapastaŭlenych vajskoŭcaŭ, błohieraŭ i žurnalistaŭ, jakija paśla stali achviarami złačynstvaŭ.
Akramia taho, u śpiecsłužbie paviedamili, što ŭ Rasii było papiaredžana 475 teraktaŭ, padrychtoŭka jakich viałasia praz Telegram.
FSB davodzić, što Telegram u Rasii atrymaŭ status nie srodku suviazi, a stratehičnaj zbroi praciŭnika.
U kantekście vajny miesiendžar nazyvajuć ličbavym štabam NATA i Ukrainy.
Durava vinavaciać u tym, što jon nie idzie na supracoŭnictva z rasijskimi siłavikami.
Tamu ŭ žniŭni 2025 hoda ŭ Rasii abmiežavali hałasavyja vykliki ŭ Telegram, što, śćviardžaje FSB, źniziła kibierzłačynnaść u RF na 23%.
10 lutaha 2026 hoda Raskamnahlad pačaŭ maštabnuju błakiroŭku, jakuju nazyvajuć «dehradacyjaj trafiku» — chutkaść pracy miesiendžara ŭpała na 55%.
Duraŭ tady adkazaŭ, što z hetaj zadumy ničoha tałkovaha nie atrymajecca.
«Rasija abmiažoŭvaje dostup da Telegram u sprobie prymusić svaich hramadzian pierajści na dziaržaŭny miesiendžar, stvorany dla nazirańnia i palityčnaj cenzury.
8 hadoŭ tamu Iran sprabavaŭ takuju ž stratehiju — i pravaliŭsia. Jon zabaraniŭ Telegram na vydumanych padstavach, sprabujučy prymusić ludziej karystacca dziaržaŭnaj alternatyvaj.
Niahledziačy na zabaronu, bolšaść irancaŭ usio jašče karystajucca Telegram (abychodziačy cenzuru) i addajuć jamu pieravahu pierad prahramami z nazirańniem.
Abmiežavańnie svabody hramadzian nikoli nie źjaŭlajecca pravilnym adkazam. Telegram abaraniaje svabodu słova i pryvatnaść, niahledziačy na cisk» — napisaŭ tady Pavieł Duraŭ.
Ciapier suprać Paŭła Durava ŭ Rasii raspačata kryminalnaja sprava pa artykule «Sadziejničańnie terarystyčnaj dziejnaści» (č. 1.1 art. 205.1 KK RF).
Kamientary