praces “Pahoni”
Pahražaje turma
18 červienia sud pa spravie Mikoły Markieviča i Paŭła Mažejki pierajšoŭ u stadyju sprečak bakoŭ. Sudovaje śledztva skončyłasia jašče 13 červienia. U toj dzień zranku na dźviarach usich mužčynskich prybiralniaŭ Leninskaha sudu źjavilisia adnolkavyja, akuratna zroblenyja šyldački “Nie rabotajet”. Žanočyja prybiralni praciahvali pracavać. Choć, napeŭna, vyhladajuć ź siaredziny nia lepiej za mužčynskija. Vidać, u sudzie čakali zamiežnych dyplamataŭ, jakija prysutničali na pieršych pasiedžańniach i źbiralisia pryjechać na jaho zakančeńnie. Dyplamataŭ sudovyja “leninskija” prybiralni, biezumoŭna, urazili.
Advakat M.Markieviča S.Curko ź Miensku zaznačyŭ u sudzie nastupnaje. Materyjały aryštavanych numaroŭ “Pahoni” (№36 i 37 za vierasień 2001 h.) śledztva atrymała z dapamohaj KDB — z parušeńniami Kryminalna-pracesualnaha kodeksu. Nia byŭ aformleny pratakoł vymańnia materyjałaŭ ź Internetu, nie było paniatych. A dokazy, atrymanyja z parušeńniem zakanadaŭstva, nia majuć jurydyčnaj siły. Tamu jany nia mohuć być pakładzienyja ŭ asnovu abvinavačańnia. Advakat P.Mažejki A.Biryłaŭ paznajomiŭ sud z ekspertnaj vysnovaj siabra Biełaruskaha PEN-centru M.Tyčyny adnosna taho, što ŭ publikacyjach “Pahoni” nie było paklopu. Advakaty začytali taksama šmatlikija listy ŭ abaronu žurnalistaŭ — ad hramadzkaści, žurnalisckich arhanizacyjaŭ, PEN-centru, Mižnarodnaha sudu pa pravach čałavieka ŭ Strasburhu dy inšych. A hałoŭny specyjalist pa internet-prahramach Haradzienskaha ŭniversytetu Ju.Tarasievič zaśviedčyŭ, što materyjały aryštavanych numaroŭ hazety, atrymanyja śledztvam nibyta z sajtu “Pahoni”, mahli być uziatyja adkul zaŭhodna. Pahatoŭ, adras sajtu na ich adsutničaje.
Mikoła Markievič źviarnuŭ uvahu sudu na nastupnuju dosyć dziŭnuju akaličnaść. U dakumentach abłasnych KDB i prakuratury ad 5 vieraśnia 2001 h. (dzień aryštu ŭ drukarni nakładu №36) havorycca ab fakcie “nadrukavańnia” abo “publikacyi” materyjałaŭ u №36. Choć viadoma, što nakład byŭ aryštavany kala drukarskaha varštatu. Takim čynam, numar nie raspaŭsiudžvaŭsia. Dyk pra jakuju publikacyju možna kazać? Hazeta ž tak i nia vyjšła! A značycca, z samaha pačatku ŭ spravie była niejkaja falsyfikacyja.
Ranicaj 18 červienia ŭ sudzie śmiardzieli prybiralni. Heta adčuvałasia navat u zali, dzie pavinien byŭ adbycca praces. Pryčym, prybiralni nie pracavali. Pierad samym pačatkam słuchańniaŭ u zali źjavilisia try staličnyja hości — redaktar “Narodnaj voli” Ja.Siaredzič dy vice-prezydenty BAŽ Ju.Taparašaŭ i A.Hulajeŭ. Dla ich znajšłosia miesca tolki na łavie padsudnych — u zaharadcy. Ja.Siaredzič paviedamiŭ prysutnym, što jamu daviałosia šukać prybiralniu ŭ susiednim, “dziaržstrachaŭskim” budynku, a za hety čas usie miescy ŭ zali pazajmali.
Haradzienski krajaznaŭca A.Talerčyk raspavioŭ hramadzie, što ŭ 1833 h. u Horadni carski sud pakaraŭ śmierciu hrupu patryjotaŭ na čale ź Michałam Vałovičam. Apošni mieŭ majontak u rodnaj vioscy sp.Talerčyka — Pareččy (Słonimščyna). Krajaznaviec padpisaŭ i padaravaŭ padsudnym i ichnym advakatam svaju knižku pra Parečča. Mikoła Markievič nie bieź ironii zaznačyŭ: “Spadziajusia, što naš los budzie lepšym za los Vałoviča”.
Tym časam pačaŭsia sud, słova atrymaŭ dziaržaŭny abvinavaŭca U.Rabaŭ. Jon skazaŭ, što ličyć žurnalistaŭ vinnymi ŭ paklopnictvie na A.Łukašenku i prosić dla Paŭła Mažejki 2 hady źniavoleńnia ŭ kalonii ahulnaha režymu. Niekalki dzieciukoŭ uskočyli i pačali skandavać: “Hańba!” Sudździ T.Klimavaj ničoha nie zastavałasia, jak pierapynić pasiedžańnie da ranicy sierady. Na nastupnym pasiedžańni abvinavaŭca paprasiŭ dla Mikoły Markieviča 2,5 hadu turmy.
Siarhiej Kraŭcoŭ
Kamientary