Kaniec nastalhii pa SSSR

U hramadztvie sfarmavałasia novaja bolšaść — prychilnikaŭ niezaležnaści i dałučeńnia da Eŭraźviazu. Rasiejskija sacyjolahi z centru VCIOM, ahučvajučy vyniki svaich daśledavańniaŭ napiaredadni jałcinskaha samitu, nie prychoŭvali namieru dakazać, što ideja intehracyi słavianskich respublik byłoha SSSR karystajecca vialikaj papularnaściu siarod ich žycharoŭ. Adnak apytańnie zafiksavała advarotnyja tendencyi.Niahledziačy na chitruju farmuloŭku pytańnia, amal pa 30% biełarusaŭ vyznačyli pryjarytetam žyćcio ŭ niezaležnaj krainie i intehracyju ŭ Eŭropu.

U sumie «niezaležnikaŭ» (A) i «praeŭrapiejcaŭ» (B) nabirajecca 56% proci 32% u sumie «pansłavistaŭ» (V) i «prasavieckich» (H). Dla paraŭnańnia: va Ŭkrainie ź jaje ekanamičnym biazładździem hetaja praporcyja składaje ŭsiaho 47:42, što stavić pad sumnieŭ šancy Viktara Juščanki ŭ prezydenckaj honcy.

Biełaruskuju častku apytańnia ažyćciaŭlała respektabelnaja sacyjalahičnaja słužba «Novak». Źmieny ŭ śviadomaści biełarusaŭ fiksavali apošnim časam i inšyja sacyjolahi. Naprykład, NISEPD u svaim apošnim zandažy vyjaviŭ, što absalutnaja bolšaść biełarusaŭ (u sumie 57%) vyvodzić karani nacyjanalnaje dziaržaŭnaści z VKŁ i BNR, i absalutnaja mienšaść — z BSSR i RB. Cikava, što dźvie hetyja ličby — 56% prychilnikaŭ eŭraniezaležnaści i 57% ludziej ź niesavieckaj histaryčnaj śviadomaściu — amal supadajuć.

Vyniki fenamenalnyja, kali ŭličyć uzmacnieńnie «idealahičnaje pracy» i neŭtralitet niezaležnych ŚMI — naprykład, u ich praktyčna nie było nehatyŭnych acenak faktu stvareńnia Eŭrazijackaje ekanamičnaje prastory. Niešta padobnaje adbyvałasia ŭ 70—80-ch u kantralavanych Savieckim Sajuzam krainach Centralnaj Eŭropy.

Što abumoŭlivaje źmieny ŭ śviadomaści? Najpierš, faktar hieahrafii i zamiežnych pajezdak. Dola biełarusaŭ, jakija byvali ŭ krainach Eŭraźviazu, u razy bolšaja, čym siarod žycharoŭ Rasiei j Ukrainy. Akramia taho, ekanamičny rost vyvieŭ hramadztva sa stanu tryvožnaje niaŭpeŭnienaści, charakternaha dla 90-ch. Narešcie, palityčnyja siły, što vystupali pad lozunhami intehracyi z Rasiejaj, ciapier pahłynutyja niepapularnymi idejami treciaha terminu i pryvatyzacyi dziaržaŭnaje majomaści.

Možna čakać, što biełaruskija palityki stanuć usio achvotniej vykarystoŭvać eŭrapiejskuju kartu. Adnačasova navat zvyčajnyja vizavyja abmiežavańni stanoviacca efektyŭnym metadam cisku na łukašenkaŭcaŭ.

Mikoła Buhaj

• 0
• 0
• 0
• 0
• 0
• 0
• 0
• 0