Palityk, jaki łović rybu rukami

Juraś Hubarevič: Sytuacyju ŭ krainie treba mianiać

26-hadovy Juraś Hubarevič — adzin ź niamnohich palitykaŭ, jaki maje adpaviednuju adukacyju: jon skončyŭ mahistraturu pa specyjalnaści «dziaržaŭnaje kiravańnie». Juraś — deputat Biełaazierskaha haradzkoha Savietu.

«NN»: Juraś, u Biełarusi šyroka raspaŭsiudžana mierkavańnie, što miascovyja saviety ničoha nie vyrašajuć. Što ty jak deputat harsavietu možaš skazać?

JUH: Naša praktyka pakazvaje, što varta sprabavać niešta rabić. Vada i kamień točyć. Asabliva kali ty nie samotny, a maješ paplečnikaŭ. My niadaŭna damahlisia admieny ŭ rajonie miascovaha zboru za karystańnie abjektami dobraŭparadkavańnia i infrastruktury, jaki płacili ŭładalniki aŭtamabilaŭ, pryčym nia tolki z našaha, ale i dvuch susiednich — Ivacevickaha i Pružanskaha — rajonaŭ. Zbor byŭ niezakonny, tamu što nie było kankretyzacyi, što źjaŭlajecca abjektam padatkaabkładańnia. Paśla taho jak my pačali jaho abskardžvać va ŭsich instancyjach, vertykal spuściła raznaradku ŭ rajsaviet, i toj sam admianiŭ zbor. Samaje cikavaje — abhruntavańnie, ź jakim jaho admianili: maŭlaŭ, u rajonnym biudžecie znajšlisia hrošy, tamu zbor možna admianić. Dyk heta značyć, što kali razabracca — i hrošy ŭ biudžecie znachodziacca, i jość što kraści! Kali aryštoŭvajuć vysokapastaŭlenaha biarozaŭskaha čynoŭnika — značyć, jość što kraści! Ciapier my z kamandaj źbirajemsia damahčysia viartańnia ludziam hetych hrošaj. A nastupnym pytańniem my chočam daviedacca, kudy iduć hrošy ad subotnikaŭ.

«NN»: A dzie harantyja, što vy, pryjšoŭšy da ŭłady, nia budziecie kraści?

JUH: Usiakaja achvota kraści adpadaje, kali systema prazrystaja. Prosta ludziam treba tłumačyć, kudy iduć hrošy. Jany navat u bolšaści vypadkaŭ hatovyja zapłacić hrošy, kali viedajuć, što heta pojdzie tudy i tudy. Jak z hetym zboram: 2% ludziej, jakija viedali zakon i byli ŭpeŭnienyja ŭ svajoj pravacie, prosta admaŭlalisia płacić zbor, i DAI nie mahło ničoha ź imi zrabić. Heta pakazvaje, što kali čałaviek adstojvaje svajo prava i viedaje zakon, u jaho nichto nie adbiare jaho hrošy. Ludzi pavinny kantralavać uładu. I, naturalna, patrebnaja vybarnaść vyšejšych pasadaŭ. Mer ci starasta horadu pavinien być padadkazny ludziam.

«NN»: Ciapier modna raspracoŭvać stratehii raźvićcia dla paasobnych rehijonaŭ. Ci jość u vas stratehija raźvićcia Biełaaziersku i Biarozaŭskaha rajonu?

JUH: My šukajem mahčymaści, kab zrabić hruntoŭnuju daśledčyckuju pracu nad stratehijaj. Hetaja stratehija pavinna ŭklučać dva momanty: pryvabnaść dla žycharoŭ i pryvabnaść dla investaraŭ. Jaki rehijon pieršy heta zrobić, toj maje najlepšyja šancy na investycyi. Ale zrazumieła, što realizacyija stratehij ciapier upirajecca ŭ ahulnuju sytuacyju ŭ krainie, što heta praca na budučyniu.

«NN»: Jak składajucca tvaje stasunki z deputatami paśla vosieńskich davybaraŭ, kali ciabie i tvaich paplečnikaŭ chajali ŭ hazetach i dzie tolki mahli?

Poŭnaściu hety artykuł možna pračytać u papiarovaj i pdf-versii "Našaj Nivy"

Hutaryła Vieranika Dziadok

***

Bijahrafija

Juraś Hubarevič u 2000 skončyŭ Biełaruskuju dziaržaŭnuju politechničnuju akademiju pa specyjalnaści inžyner-elektryk, u 2003 h. atrymaŭ dyplom mahistra dziaržaŭnaha kiravańnia (Akademii dziaržaŭnaha kiravańnia pry prezydentu Ŭkrainy i Ŭniversytetu Paŭnočnaha Londanu). Z 1996 da 1998 ŭ Maładym Froncie, z 2000 — staršynia Centru rehijanalnaha supracoŭnictva (Biełaaziersk), u 2003 abrany namieśnikam staršyni Biełaazierskaha harsavietu.

• 0
• 0
• 0
• 0
• 0
• 0
• 0
• 0