9 кастрычніка ў 18.00у галерэі сучаснага мастацтва «Ў» у Мінску (пр-т Незалежнасці, д. 37а) адбудзецца прэзентацыя спецыяльнага нумара «ARCHE» пад назвай «Польшча ў Другой сусветнай вайне». Прэзентацыя арганізуецца па ініцыятыве і пры ўдзеле Пасольства Польшчы ў Беларусі.
Нумар, выдадзены з нагоды 70-годдзя заканчэння Другой сусветнай вайны, утрымлівае артыкулы польскіх і беларускіх гісторыкаў і ахоплівае сваім зместам асноўныя вехі з гісторыі польскага ўзброенага чыну падчас Другой сусветнай вайны.
Чытач знойдзе ў ім артыкулы, прысвечаныя чыста вайсковай праблематыцы (гісторыя стварэння і баявога шляху паасобных вайсковых фармаванняў), а таксама даследаванні, якія тычацца ваенна-палітычнай сітуацыі ў Польшчы напярэдадні і падчас Другой сусветнай вайны. Разгледжана як гісторыя рэгулярных вайсковых фармаванняў, якія дзейнічалі на розных франтах вайны, так і гісторыя незалежніцкага партызанскага руху.
Сярод іншага, у нумары змешчаны тэматычныя карты, шматлікія фотаздымкі і ілюстрацыі.
У рамках прэзентацыі будзе таксама прадстаўлена кніга аднаго з аўтараў спецыяльнага выпуску часопіса «ARCHE», гісторыка Ігара Мельнікава «Мяжа ля Заслаўя 1921-1941 гг.».
Сардэчна запрашаем да ўдзелу ў прэзентацыі, уваход вольны.
Комментарии