Міліцыя блякавала прыватны дом у Магілёве (вуліца Чкалава, 16), дзе адбываўся сэмінар актывістаў апазыцыйнага моладзевага руху.
14 жніўня ў Магілёве трое актывістаў польскіх няўрадавых арганізацыяў больш за тры гадзіны прабылі ў абложаным міліцыянтамі прыватным доме. Яны прыехалі ў Магілёў на сустрэчу зь беларускімі калегамі — абмеркаваць супрацоўніцтва ў галіне навучаньня і работы са сродкамі масавай інфармацыі.
Разам з польскімі гасьцямі аблогу трымалі яшчэ каля пятнаццаці чалавек. Трое зь іх — актывісты моладзевай арганізацыі «Трэці шлях» зь Менску.
6 міліцыянтаў, трое зь якіх былі ў цывільным, уварваліся на падворак прыватнага дому, калі праца ўжо распачалася. Гаспадары пасьпелі зачыніць дзьверы і заставаліся ў доме больш за тры гадзіны.
Кіраўнік рэгіянальнай арганізацыі партыі БНФ Рыгор Кастусёў, уладальнік дому, выклікаў міліцэйскі нарад. З прыбыцьцём узброенага нараду міліцыянты суцішыліся.
У выніку перамоў палякі пагадзіліся вярнуцца разам зь міліцыянтамі ў гатэль, дзе пакінулі свае дакумэнты. Пасьля праверкі пашпартоў грамадзянам Польшчы дазволілі доўжыць побыт у Магілёве.
Спраўджаньне пашпартоў нямецкіх гасьцей зацягнулася амаль на гадзіну. Міліцыянты дамагаліся атрымаць ад немцаў запрашэньні, бо, паводле візаў, тыя знаходзяцца ў Магілёве ў дзелавой камандзіроўцы. Пасьля дакладнага разбору немцаў таксама адпусьцілі.
Спраўджаньне дакумэнтаў адбывалася ў фае гатэлю «Магілёў». Міліцыянты адмовіліся камэнтаваць свае дзеяньні.
Уражаньні пра аблогу і стасункі з прадстаўнікамі органаў аховы правапарадку выказаў «Свабодзе» адзін з польскіх моладзевых актывістаў:
«Гэта была першая сытуацыя, калі я сустрэўся зь сілавымі органамі Беларусі. І гэта было ня вельмі прыемна. Я ня мог ім давяраць: мне падалося, яны шукаюць спосаб, каб сказаць, што мы зрабілі штосьці дрэннае. Я размаўляў з супрацоўнікам, здаецца, КГБ (гэта былі людзі ў цывільным). Яны трымаліся па‑хамску, зусім ня мелі пашаны да права. Таму даводзілася быць дужа асьцярожным».
Нягледзячы на перашкоды з боку міліцыі сустрэча будзе доўжыцца, — запэўніваюць арганізатары. Гаворыць адзін зь іх, Аляксандар Апекін:
«Сёньняшні дзень нашай сустрэчы сарваны. Але мы лічым, што мусім працягваць. Наша праграма будзе ісьці далей — як заплянавана».
Арганізатары сустрэчы зьвярнуліся да журналістаў з просьбай не называць прозьвішчаў гасьцей — каб у іх засталася магчымасьць наведаць Беларусь яшчэ раз і працаваць адпаведна з праграмай.
«Месячны плацеж пацягне на 340 рублёў». Што будзе ў Беларусі з мабільным інтэрнэтам?15
Каментары