Мангэтэнская пракуратура паведаміла аб апошніх прысудах па грандыёзнай крымінальнай справе аб крадзяжы і гандлі нумарамі дзясяткаў тысяч крэдытных карт.
Па гэтай і сумежных справах прыцягнутыя да адказнасьці прынамсі 17 чалавек з розных краін, у тым ліку Беларусі, Расеі і Ўкраіны. Пра гэта паведамляе карэспандэнт BBC ў ЗША.
Пракуратура сукупна называе іх чальцамі «кібэрзлачыннай групоўкі Western Express», паводле назвы нью-ёркскай кампаніі Western Express International, якая, па словах пракурораў, выкарыстоўвалася ашуканцамі для пераводу і адмываньня незаконных прыбыткаў.
Паводле пракуратуры Мангэтэну, якая восем гадоў расьсьледавала гэтую справу разам з сакрэтнай службай ЗША, групоўка прадала больш за 95 тысяч нумароў крадзеных крэдытак.
Спрычыненая пацярпелым шкода перавысіла 5 млн даляраў.
11 фігурантаў справы прызналі сябе вінаватымі і асуджаныя.
Двое абвінавачаных, 32-гадовы грамадзянін Малдовы Алег Кавелін і 30-гадовы беларус Дзьмітры Бурак хаваюцца ад правасудзьдзя.
Кавелін па зьвестках сьледзтва нібыта спэцыялізаваўся на тым, што падманам выведваў у пацярпелых асабістыя дадзеныя і узломваў іх рахункі.
Бурак быў адміністратарам форуму DumpsMarket, на якім кібеэрзлачынцы прадавалі і куплялі нумары крэдытак і іншыя дадзеныя.
У электроннай пошце Бурака нібыта былі знойдзены больш за 55 тысяч крадзеных нумароў крэдытак.
Супраць яго распачатая аналягічная справа ў Каліфорніі.
Каментары