Двух падпалкоўнікаў сталічнай міліцыі падазраюць у крадзяжы грошай у банку
Начальнік аддзела маральнасці і процідзеяння гандлю людзьмі Заводскага РУУС падпалкоўнік П., а таксама яго падначалены падпалкоўнік Г. падазраюцца ў саўдзеле ў крадзяжу сродкаў ЗАТ «Ідэя Банк».
Варта адзначыць, што толькі за апошнія тры месяцы праваахоўнымі органамі Мінска была заведзена ўжо больш за 5 крымінальных спраў па крадзяжы сродкаў ЗАТ «Ідэя банк». Гаворка ідзе аб атрыманні рознымі асобамі крэдытаў банка без намеру яго пасля аддаваць. Гэтыя дзеянні Следчы камітэт кваліфікуе як здзяйсненне па арт.209 Крымінальнага кодэкса Беларусі (махлярства). У асноўным у справах фігуруюць невялікія сумы ў раёне 4-7 мільёнаў рублёў, для атрымання якіх патрэбен мінімум дакументаў. Аднак чарговы факт крадзяжу сродкаў ЗАТ «Ідэя банк» выбіўся з агульнай каляіны не толькі сумай, але і суўдзелам у ім двух падпалкоўнікаў міліцыі.
Паводле дадзеных Следчага камітэта, спачатку крымінальная справа была заведзеная на 27-гадовую жанчыну і 28-гадовага мужчыну - жыхароў Мінска. Яны падазраюцца ў тым, што 10 і 16 ліпеня 2013 года ашуканскім шляхам завалодалі 19,4 мільёнамі рублёў, якія належаць ЗАТ «Ідэя Банк». Гэтыя дзеянні былі кваліфікаваныя Следчым камітэтам па ч.2 арт.209 Крымінальнага кодэкса (махлярства, учыненае групай асоб).
У ходзе правядзення аператыўна-вышуковых мерапрыемстваў Галоўным упраўленнем уласнай бяспекі (ГУУБ) МУС было ўстаноўлена, што, магчыма, хаўруснікамі злачынства з'яўляюцца начальнік аддзела Заводскага РУУС Мінска падпалкоўнік П. і аперупаўнаважаны гэтага ж аддзела падпалкоўнік міліцыі Г. У дачыненні да падпалкоўнікаў, адзін з якіх затрыманы, таксама заведзеная крымінальная справа. Вядзецца расследаванне.
Варта адзначыць, што зусім нядаўна сталічную міліцыю ўзрушыў буйны крымінальны скандал, калі была заведзеная крымінальная справа адразу на чатырох байцоў спецпадраздзялення АМАП. Яны падазраюцца ў здзяйсненні рабаванняў жыхароў сталіцы. Пры гэтым амапаўцы былі звольненыя кіраўніцтвам па пагадненні бакоў, каб захаваць чысціню мундзіра. Аднаму з падазраваных ўдалося схавацца - ён цяпер знаходзіцца ў вышуку.
Цяпер чытаюць
Бабарыка пра сябе ў 2020-м: Гэта не наіўнасць. Не думаю, што такога крыважэрнага сцэнара нехта чакаў46
Каментары