Лідар грамадзянскай кампаніі «Гавары праўду!», экс-кандыдат у прэзідэнты Беларусі Уладзімір Някляеў 12 лістапада наведаў Брэст, каб сустрэцца са сваімі прыхільнікамі.
Брэсцкія актывісты «Гавары праўду!» сабралі 1.122 подпісы за аднаўленне дзіцячага гарадка ў брэсцкім раёне Усход. Апошнім подпіс паставіў Уладзімір Някляеў, пасля чаго разам з брэсцкімі лідарамі кампаніі аднёс іх у гарвыканкам.
У другой палове дня Някляеў у рэдакцыі газеты «Брестский курьер» сустрэўся з актывам «Гавары праўду!» і журналістамі.
Палітык заявіў, што збіраецца ўзяць удзел у наступных прэзідэнцкіх выбарах. Разам з тым, калі б выбары адбыліся сёння, ён бы ў іх не ўдзельнічаў.
Паколькі на гэты час, паводле меркавання Някляева, апазіцыя да прэзідэнцкіх выбараў не гатовая.
«Трэба тэрмінова збіраць кангрэс дэмакратычных сіл і выпрацоўваць стратэгію дзеянняў на бліжэйшыя гады, — сказаў Някляеў. — Сёння гэта пытанне мы абмяркоўвалі ў Брэсце з Аляксандрам Мілінкевічам. Ні ў якім разе нельга дапусціць тых памылак, якія мы дапусцілі ў 2010 годзе».
Таксама лідар «Гавары праўду!» не выключыў пераносу прэзідэнцкіх выбараў з 2015 года на 2014 год. «Гэта можа быць выгадна Лукашэнку, — лічыць Някляеў.
— Але ў той жа час, калі ў краіне няма выбараў, то праз выбары памяняць сітуацыю ў краіне нельга. У гэтым выпадку ў нас ёсць два варыянты: рэвалюцыйны і эвалюцыйны, шляхам рэфармавання. Я за другі варыянт. Больш за палову чыноўнікаў разумеюць, што ў краіне трэба штосьці мяняць. І яны зробяць гэтыя крокі. Зробяць, калі будуць адчуваць, што ім за гэта не будзе пагражаць турма».
«Аслабленне пазіцый Лукашэнкі дае такім людзям шанс паказаць сябе і пачаць рэформы. Яны гэта адчулі на апошнім спектаклі ў выкананні Лукашэнкі зусім нядаўна. Яны ўбачылі, што гэты чалавек не ўсёмагутны, што ён стаміўся. Чыноўнікі ўсё бачаць, ведаюць, як да Лукашэнкі ставяцца ў свеце, яны добра разумеюць, што ўсё, што можна было выйграць з ім, яны ўжо выйгралі, і трэба шукаць новыя гульні», — перакананы апазіцыйны палітык.
У той жа час Някляеў прызнаў, што ў наменклатуры сіл і ўплыву больш, чым у апазіцыі.
«Нам не трэба прадстаўляць уладу як штосьці асобнае ад грамадства, улада — гэта частка нашага грамадства, і з імі не трэба размаўляць, як з ворагамі, як гэта робіць Лукашэнка. Многія чыноўнікі разумеюць, што скінуць адказнасць на аднаго Лукашэнку не выйдзе, таму яны ўжо думаюць пра змяненні ў краіне», — лічыць палітык.
Цяпер чытаюць
Дашкевіч расказаў, як трапіў за кратамі ў «нізкі статус» і напісаў прашэнне аб памілаванні6
Каментары