Niaklajeŭ nie vyklučaje daterminovych prezidenckich vybaraŭ u 2014 h.

Lidar hramadzianskaj kampanii «Havary praŭdu!», eks-kandydat u prezidenty Biełarusi Uładzimir Niaklajeŭ 12 listapada naviedaŭ Brest, kab sustrecca sa svaimi prychilnikami.

Bresckija aktyvisty «Havary praŭdu!» sabrali 1.122 podpisy za adnaŭleńnie dziciačaha haradka ŭ bresckim rajonie Uschod. Apošnim podpis pastaviŭ Uładzimir Niaklajeŭ, paśla čaho razam z bresckimi lidarami kampanii adnios ich u harvykankam.

U druhoj pałovie dnia Niaklajeŭ u redakcyi haziety «Briestskij kuŕjer» sustreŭsia z aktyvam «Havary praŭdu!» i žurnalistami.

Palityk zajaviŭ, što źbirajecca ŭziać udzieł u nastupnych prezidenckich vybarach. Razam z tym, kali b vybary adbylisia siońnia, jon by ŭ ich nie ŭdzielničaŭ.

Pakolki na hety čas, pavodle mierkavańnia Niaklajeva, apazicyja da prezidenckich vybaraŭ nie hatovaja.

«Treba terminova źbirać kanhres demakratyčnych sił i vypracoŭvać stratehiju dziejańniaŭ na bližejšyja hady, — skazaŭ Niaklajeŭ. — Siońnia heta pytańnie my abmiarkoŭvali ŭ Breście z Alaksandram Milinkievičam. Ni ŭ jakim razie nielha dapuścić tych pamyłak, jakija my dapuścili ŭ 2010 hodzie».

Taksama lidar «Havary praŭdu!» nie vyklučyŭ pieranosu prezidenckich vybaraŭ z 2015 hoda na 2014 hod. «Heta moža być vyhadna Łukašenku, — ličyć Niaklajeŭ.

— Ale ŭ toj ža čas, kali ŭ krainie niama vybaraŭ, to praz vybary pamianiać situacyju ŭ krainie nielha. U hetym vypadku ŭ nas jość dva varyjanty: revalucyjny i evalucyjny, šlacham refarmavańnia. Ja za druhi varyjant. Bolš za pałovu čynoŭnikaŭ razumiejuć, što ŭ krainie treba štości mianiać. I jany zrobiać hetyja kroki. Zrobiać, kali buduć adčuvać, što im za heta nie budzie pahražać turma».

«Asłableńnie pazicyj Łukašenki daje takim ludziam šans pakazać siabie i pačać reformy. Jany heta adčuli na apošnim śpiektakli ŭ vykanańni Łukašenki zusim niadaŭna. Jany ŭbačyli, što hety čałaviek nie ŭsiomahutny, što jon stamiŭsia. Čynoŭniki ŭsio bačać, viedajuć, jak da Łukašenki staviacca ŭ śviecie, jany dobra razumiejuć, što ŭsio, što možna było vyjhrać ź im, jany ŭžo vyjhrali, i treba šukać novyja hulni», — pierakanany apazicyjny palityk.

U toj ža čas Niaklajeŭ pryznaŭ, što ŭ namienkłatury sił i ŭpłyvu bolš, čym u apazicyi.

«Nam nie treba pradstaŭlać uładu jak štości asobnaje ad hramadstva, ułada — heta častka našaha hramadstva, i ź imi nie treba razmaŭlać, jak z vorahami, jak heta robić Łukašenka. Mnohija čynoŭniki razumiejuć, što skinuć adkaznaść na adnaho Łukašenku nie vyjdzie, tamu jany ŭžo dumajuć pra źmianieńni ŭ krainie», — ličyć palityk.

• 0
• 0
• 0
• 0
• 0
• 0
• 0
• 0