Міліцыянты кажуць, што такім чынам ратуюць іх ад мясцовых «фашыстаў».
У зале чакання віцебскага вакзала ўжо некалькі гадзін пад наглядам міліцыі знаходзяцца аматары панк-музыкі з Мінска.
«Сёння ў Віцебску мусіў адбыцца канцэрт некалькіх мінскіх панк-гуртоў. Мы ехалі на цягніку — хто з Мінска, хто з Брэста. У Оршы мы сутыкнуліся з супрацоўнікамі міліцыі, якія не прадставіліся, у грубай форме патрабавалі ў мяне і маіх сяброў дакументы», распавядае Максім, адзін з затрыманых (імя змененае — НН).
Міліцыянты даглядзелі ў цягніку асабістыя рэчы хлопцаў. Адзін з іх спрабаваў здымаць гэта на відэа. У яго забралі тэлефон і адфарматавалі флэшку.
Тое ж здарылася і з музыкамі, якія ехалі гэтым жа цягніку.
Ад Оршы да Віцебска юнакоў суправаджалі два міліцыянты. А ў Віцебску на вакзале чакалі людзі ў цывільным, супрацоўнікі АМАПу і міліцыі.
«Нас завялі ў апорны пункт. Там сказалі, што мы не затрыманыя, а знаходзімся тут для ўласнай бяспекі, бо нібыта на вуліцы стаяць 30 мясцовых фанатаў-нацыстаў, якія хочуць нас пабіць.
Мы спрабавалі даведацца, чаму затрымліваюць менавіта нас, тых хто проста прыехалі слухаць і граць музыку, а не тых, хто нібыта спрабуе збіць. Але не атрымалі адказ», — кажа Максім.
Міліцыянты сказалі, што канцэрту не будзе. І запатрабавалі, каб юнакі памянялі свае білеты на 18:50 на цягнік Віцебск-Гродна.
Салігорцаў, якія не змаглі памяняць ці набыць квіткі, адправілі на дызелі да Оршы.
Да дадзены момант каля 25 чалавек знаходзяцца пад наглядам міліцыі ў зале чакання віцебскага вакзала.
«Нас адпускаюць толькі невялікімі групамі ў прыбіральню і ў бліжэйшыя кіёскі на тэрыторыі вакзала. З намі тры супрацоўнікі міліцыі, адзін супрацоўнік у цывільным. Ля выхада з залы чакання — некалькі амапаўцаў. Некаторыя людзі маглі б застацца і заночыць у сваіх сваякоў і сяброў, але прымушаюць з’ехаць з горада менавіта сёння», — кажа Максім.
Па словах Максіма, у Оршы двух хлапцоў, што таксама збіраліся на канцэрт, забраў супрацоўнік КДБ — прыйшоў у міліцыю, паказаў на іх пальцам і сказаў «гэтыя ідуць са мной».
Пакуль што пацвердзіць гэту інфармацыю і даведацца, што здарылася з аршанцамі, не атрымалася.
У чым прычына незадаволенасці жыхароў мікрараёна Лебядзіны ў Мінску? Вось што насамрэч там планавалі будаваць6
Каментары