На здымках фільма «Авель» на Плошчы будуць кідаць «кактэйлі Молатава»
Удзельнікі масоўкі на здымках фільма «Авель», пераважна студэнты, сабраліся ў галоўных корпусах Белдзяржуніверсітэта і Педуніверсітэта, перадае карэспандэнт «Нашай Нівы» з месца падзей.
Сёння на плошчы Незалежнасці маюць здымаць сцэны масавых пратэстаў. А 20.45 перад студэнтамі ў БДУ выступіў памочнік рэжысёра, які прадставіўся як Віталій.
Праз некалькі хвілін пачнуцца здымкі на плошчы Незалежнасці, сказаў ён.
Першыя кадры — будуць кідаць бутэлькі з запальнай сумессю. Рабіць гэта будуць каскадзёры, супакоіў масоўку Віталій, вам трэба будзе толькі стаяць у вызначаных месцах.
Другі момант, на якім акцэнтаваў увагу памочнік рэжысёра, — нельга ні ў якім разе крычаць «Жыве Беларусь!»
«Зразумейце, гэты фільм здымаецца не на аснове рэальных падзей, — казаў ён. — Таму ніякіх «Жыве Беларусь!» быць не павінна».
Але які ж мітынг пратэсту без лозунгаў? Масоўцы дазволілі крычаць «Мы протів!» і «Что-то не так!»
Каментары