Пытанне павышэння пенсійнага ўзросту пакуль не разглядаецца
Пытанне павышэння пенсійнага ўзросту ў Беларусі зараз не разглядаецца, заявіла міністр працы і сацыяльнай абароны Марыяна Шчоткіна, адказваючы 18 чэрвеня на пытанні дэпутатаў на сесіі палаты прадстаўнікоў.
«Гэтае пытанне вельмі важнае для людзей, — падкрэсліла яна. — Грамадскае меркаванне сёння негатыўна адносіцца да магчымага павышэння пенсійнага ўзросту. У міністэрстве сёння мы не працуем над якімі-небудзь дакументамі, якія прадугледжвалі б яго павышэнне».
Замест павышэння пенсійнага ўзросту, працягнула Шчоткіна, у Мінпрацы праводзяць работу па стымуляванні працягу працы людзей пасля выхаду на пенсію.
Міністр зазначыла, што памер пенсій у Беларусі невялікі: у маі ён склаў у сярэднім 2 млн. 413 тыс. рублёў.
«Пяцьдзясят пяць — шасцьдзясят гадоў — не той узрост, які не дазваляе працаваць. Умовы і вакансіі для працы ў пенсіянераў ёсць», — заявіла Шчоткіна.
Варта зазначыць, што ў Беларусі захоўваецца нізкі пенсійны ўзрост — 55 гадоў для жанчын і 60 для мужчын. Паводле звестак Мінпрацы і сацабароны, такія ўзроставыя крытэрыі для звяртання па пенсію на постсавецкай прасторы дзейнічаюць толькі ў Расіі і ва Узбекістане.
Як зазначала падчас адной з нядаўніх анлайн-канферэнцый Марыяна Шчоткіна, «ва ўмовах старэння насельніцтва пенсійны ўзрост павышаюць многія краіны, у тым ліку і большасць дзяржаў на постсавецкай прасторы».
«Зараз мы пайшлі па шляху стымулявання больш позняга звароту па пенсію. Дарэчы, у стратэгіі доўгатэрміновага развіцця пенсійнай сістэмы ў Расійскай Федэрацыі прадугледжваецца ўвядзенне аналагічнага падыходу», — заявіла міністр. Яна таксама выказала меркаванне, што павышэнне пенсійнага ўзросту павінна праходзіць сінхронна ў Беларусі і Расіі, паколькі яны ствараюць Саюзную дзяржаву.
Асноўныя кірункі рэфармавання пенсійнай сістэмы акрэсліў у сваім красавіцкім пасланні да народа і парламента кіраўнік дзяржавы. Зазначыўшы, у прыватнасці, што «рабочых рук становіцца менш, а пенсіянераў дастаткова шмат», Аляксандр Лукашэнка ўказаў на неабходнасць «глыбей падумаць, як зацікавіць насельніцтва працаваць больш працяглы час пасля дасягнення пенсійнага ўзросту».
Цяпер чытаюць
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль7
Каментары