У Івацэвіцкім раёне 25 чэрвеня вадзіцель збіў веласіпедыстку і ўцёк з месца здарэння.
Як паведаміла начальнік аддзялення па агітацыі і прапагандзе ДАІ УУС Брэсцкага аблвыканкама Наталля Сахарчук, гэта здарылася ў 7.20 на першым кіламетры аўтадарогі вёска Бараны — вёска Воля. Вадзіцель «Сузукі» ўчыніў наезд на адну з дзвюх веласіпедыстак, якія ехалі ў спадарожным напрамку.
Віноўнік аварыі спачатку спыніўся і падышоў да жанчыны, якая ўпала з веласіпеда, затым пакінуў месца ДТЗ.
55-гадовая веласіпедыстка, якая атрымала закрыты пералом першага паяснічнага пазванка, шпіталізаваная ў Івацэвіцкую цэнтральную раённую бальніцу. Яна жыхарка вёскі Бараны.
Падчас аператыўна-вышуковых мерапрыемстваў супрацоўнікі ДАІ знайшлі «Сузукі» па месцы жыхарства гаспадара. Затым было ўстаноўлена, што на веласіпедыстку наехаў яго родны брат, 23-гадовы жыхар вёскі Яглевічы. Паводле папярэдніх звестак, ён узяў у брата «Сузукі» без дазволу.
Па факце дарожна-транспартнага здарэння праводзіцца праверка.
На гэты час устаноўлена, што ў 23-гадовага хлопца няма вадзіцельскіх правоў. У 2013 годзе ён учыніў ДТЗ і ўцёк з месца здарэння, дагэтуль яго двойчы затрымлівалі за рулём у стане алкагольнага ап'янення.
«З пачатку гэтага года ў Брэсцкай вобласці адбылося 20 ДТЗ, з месца ўчынення якіх вадзіцелі ўцяклі. У такіх аварыях два чалавекі загінулі і 21 быў паранены. Асобы 17 вадзіцеляў устаноўлены», — расказала Сахарчук.
Цяпер чытаюць
Што азначае расследаванне Міжнароднага крымінальнага суда для Лукашэнкі і беларусаў? Тлумачыць Кацярына Дзяйкала9
Каментары