Усе кнігарні «Белкнігі» да канца года аснасцяць электроннай даведачнай сістэмай
Усе кнігарні ААТ «Белкніга» да канца 2014 года будуць аснашчаныя электроннай даведачнай сістэмай.
Аб гэтым паведаміла сёння журналістам міністр інфармацыі Беларусі Лілія Ананіч на адкрыцці кнігарні ў Мінску.
«Дырэктар ААТ «Белкніга» Аляксандр Вашкевіч нас запэўніў, што ў бягучым годзе ў зале кожнай кнігарні будзе ўстаноўлена даведачная сістэма, а ў буйных — па дзве або тры, каб кожны, хто прыходзіць у гандлёвы аб'ект, мог самастойна знайсці неабходную кнігу», — адзначыла міністр.
Даведачная сістэма стане своеасаблівым навігатарам падбору кніг: яна будзе паказваць, ці ёсць у краме кніга, а калі не — то ў якім гандлёвым аб'екце яе можна знайсці.
«Гэта сістэма таксама будзе добрым барометрам запатрабаванасці кніг і аўтараў не толькі ў канкрэтнай краме, але і ў кніжнай прасторы краіны», — адзначыла Лілія Ананіч. Можна будзе спыніць спрэчкі аб тым, хто аўтар, якога найбольш чытаюць, і інш. Атрыманыя даныя будуць карыснымі не толькі арганізацыям, што рэалізуюць кнігі, але і кнігавыдаўцам, лічыць міністр.
Паводле інфармацыі Ліліі Ананіч, сёння дзяржава выпускае па сацыяльна значных праектах каля 130 кніг з 11 тыс. найменняў, якія выдаюцца ў краіне.
«Гэтыя 130 кніг — тыя кнігі, якія можа выдаваць толькі дзяржава. Магчыма, іх будзе і больш, напрыклад, з наступнага года мы плануем на конкурснай аснове прыцягваць вялікую колькасць творчых калектываў да распрацоўкі асобных найбольш сацыяльна значных праектаў», — паведаміла кіраўнік Мінінфарма.
Таксама міністр выказала меркаванне, што прыярытэтнае месца ў кнігарнях краіны павінны займаць кнігі на беларускай мове і кнігі беларускіх аўтараў.
Каментары