Праводзіцца праверка па факце ДТЗ у Кобрынскім раёне, у выніку якога кіроўца збіў пешахода і ўцёк з месца здарэння.
Як паведаміў начальнік аддзялення па агітацыі і прапагандзе ДАІ УУС Брэсцкага аблвыканкама Наталля Сахарчук, 2 лістапада мужчыну ў кювеце з траўмамі, характэрнымі для дарожна-транспартнага здарэння, на 15-м км аўтадарогі Грушава — Дзямідаўшчына — Шэметаўка знайшоў мясцовы жыхар і выклікаў хуткую дапамогу. Пацярпелага, 39-гадовага жыхара вёскі Падзяменне, з адкрытай чэрапна-мазгавой траўмай, пераломам касцей носа, вялікай ранай левага сцягна, пераахаладжэннем даставілі ў Кобрынскую цэнтральную раённую бальніцу.
Падчас аператыўна-вышуковых мерапрыемстваў было ўстаноўлена, што мужчына атрымаў траўмы 1 лістапада каля 21.00 у выніку наезду аўтамабілем «Фальксваген-Пасат», за рулём якога знаходзіўся 47-гадовы жыхар Драгічынскага раёна.
Супрацоўнікі ДАІ знайшлі кіроўцу і аўтамабіль 3 лістапада ў 12.05 у вёсцы Грушава Кобрынскага раёна. «Фальксваген» канфіскаваны і змешчаны на штрафстаянку.
Паводле папярэдніх звестак, на закругленні дарогі ўлева кіроўца не справіўся з кіраваннем, выехаў на правую па ходзе руху абочыну і ўчыніў наезд на пешахода. Паводле слоў аўтамабіліста, пасля наезду ён спыніўся, не ўбачыўшы пацярпелага, пакінуў месца ДТЗ.
Цяпер чытаюць
Хто той неадэкватны беларус, які ляснуў дзіцятка галавой аб падлогу ў маскоўскім Шарамеццеве5
Каментары