Працэдура выбараў прэзідэнта Рэспублікі Беларусь можа быць змененая праз рэферэндум, указваюць у пастаяннай камісіі па дзяржаўным будаўніцтве, мясцовым самакіраванні і рэгламенце Палаты прадстаўнікоў у адказ на зварот групы грамадзян.
Нагадаем, у лістападзе 104 жыхары Магілёва звярнуліся з просьбай да дэпутатаў Палаты прадстаўнікоў, каб яны з мэтай эканоміі бюджэтных сродкаў правялі прэзідэнцкія выбары 2015 года самастойна, без утварэння выбарчых камісій у рэгіёнах краіны. На думку падпісантаў, правядзенне выбраў такім чынам дазволіць захаваць 100 млрд рублёў і вярнуць іх «у першую чаргу ўкладчыкам сталага веку». Апрача таго, «мадэрнізаваныя» выбары прэзідэнта дазволяць пакінуць у мінулым непрызнанне вынікаў беларускіх выбараў міжнароднай супольнасцю, санкцыі і невыязных дзяржчыноўнікаў, гаварылася ў звароце магіляўчан.
Для змены ўстаноўленага законамі парадку правядзення выбараў прэзідэнта Рэспублікі Беларусь патрабуецца ўнясенне адпаведных зменаў у Канстытуцыю і Выбарчы кодэкс, гаворыцца ў адказе старшыні пастаяннай парламенцкай камісіі па дзяржаўным будаўніцтве, мясцовым самакіраванні і рэгламенце Генадзя Грыцкевіча, які адпраўлены ў адрас ініцыятара звароту грамадзян актывіста Беларускага прафсаюза РЭП Аляксея Паўлоўскага з Магілёва.
«У адпаведнасці з артыкулам 140 Канстытуцыі Рэспублікі Беларусь, раздзел IV Канстытуцыі, які рэгламентуе ў тым ліку пытанні выбараў прэзідэнта і паўнамоцтвы дзяржаўных органаў па іх правядзенні, можа быць зменены толькі шляхам рэферэндуму», — гаворыцца ў адказе дэпутата.
«Як вынікае з адказу, дэпутаты Палаты прадстаўнікоў не супраць правядзення выбараў прэзідэнта такім чынам, які прапанавалі грамадзяне. Г.зн. і наверсе, і ўнізе ўжо склалася агульнае разуменне мэтазгоднасці правядзення выбараў так, як яны праходзяць у нашай краіне. Застаецца толькі ўтрэсці фармальнасці па законах. Трэба ствараць ініцыятыўную групу і арганізоўваць рэферэндум», — заявіў Аляксей Паўлоўскі.
Нагадаем, раней старшыня Цэнтрвыбаркама Лідзія Ярмошына сцвярджала, што на выбары 2015 года выдзелена каля 100 млрд рублёў.
Цяпер чытаюць
У Мінску завяршылі будаўніцтва пяцізоркавага гатэля на месцы колішняга «Белэкспа»7
У Мінску завяршылі будаўніцтва пяцізоркавага гатэля на месцы колішняга «Белэкспа»
Сумленне, каханне, колы пекла і галівудскі фінал. У сям’і будаўніка і бібліятэкаркі з Пружанскага раёна Ігара і Юліі Лаптановічаў арыштавалі спачатку яго, пасля — яе, а пасля і бабулю33
Каментары