З віншавальным словам на Раство да вернікаў звярнуўся біскуп Аб’яднанай Царквы Хрысціянаў веры евангельскай у Беларусі Сяргей Цвор.
Нам нарадзіўся Хрыстос!
Улюбёныя Госпадам браты і сёстры!
Дарагія служыцелі Хрыстовы!
Шаноўныя суайчыннікі!
Сардэчна вітаем і віншуем кожнага з вас са Святам Нараджэння Хрыста.
Гэта вялікі дзень, бо аднойчы Анёл Божы абвясціў з нябёсаў: «…сёння нарадзіўся вам Збаўца, Які ёсць Хрыстос Госпад, у горадзе Давіда» (Лук. 2:10-11). На працягу стагоддзяў прарокі прадказвалі Божае збаўленне, але яно стала магчыма толькі з нараджэннем Дзіцяці.
І з таго часу для людзей усяго сусвету, якія жывуць у цемры граху, сярод жыццёвага бязладдзя і лютай зімы, на небасхіле вечна ззяе Бэтлеемская зорка. Вось ужо дзве тысячы год нясе яна людзям Зямлі супакой і спадзяванне на збаўленне ад грахоўных пакутаў. І надалей яна будзе свяціць кожнаму з жывых, нібы маяк у раз’юшаным моры.
Дарагія сябры, абвяшчайце Добрую вестку людзям, якія яшчэ не спазналі збаўленне праз Хрыста! Маліцеся за сваіх родных і сяброў, знаёмых і незнаёмых, каб Госпад выратаваў іх, каб іх жыццё змяніла накірунак з цемры да святла і яны спазналі з усімі святымі велічную любоў Божую, і сталі спадкаемцамі Божага валадарства ды ўвайшлі ў вялікую сям’ю, якая завецца Царквою Ісуса Хрыста.
Сёння над светам таксама гучаць словы Анёла: «Слава на вышынях Богу, і на зямлі супакой людзям добрай волі» (Лук. 2:14). І сёння Госпад, які змілаваўся да нас, нараджаецца ў сэрцах людзей.З вялікай радасцю будзем узносіць Яму славаслоўе, хвалу і пашану, прынясём Госпаду дары нашага жыцця. І няхай множыцца Яго слава не толькі на небе, але і ад краю да краю Зямлі.
Жадаем усім вам поспехаў у духоўным і асабістым жыцці. Няхай умацоўваецца ваша вера, а служэнне набывае каштоўнасць у вачах Божых. Цяпер, калі свет пакутуе ад войнаў і рэальнай пагрозы жыцця людзей, трэба штодня ўзгадваць Божую цярплівасць. Трымайце сябе ў паслушэнстве Божаму слову, бо вы – святло свету і соль зямлі.
Няхай урачыстасць прысутнасці Святога Духа ахінае заўсёды вашыя дух і душу, а выратавальнае слова Евангелля штодня ідзе разам з вамі па складаных дарогах жыцця!
Шэсць фактаў пра Андрэя Шведа — былога генпракурора, які цяпер стаў старшынёй Вярхоўнага суда4
Каментары