Найбольш значныя для беларускай эканомікі прадпрыемствы не ўключаны з «прыватызацыйны спіс» на 2015 год.
Пра гэта паведаміў сёння на прэс-канферэнцыі ў Мінску старшыня Дзяржаўнага камітэта па маёмасці Андрэй Гаеў.
«Гэтак званых блакітных фішак у спісе на прыватызацыю вы не знойдзеце. У спісе на 2015 год — звычайныя акцыянерныя таварыствы. Прапановы выпрацаваныя дзяржаўнымі органамі па магчымай рэалізацыі таго ці іншага пакета акцый з мэтай прыцягнення інвестара і развіцця гэтых акцыянерных таварыстваў», — сказаў Гаеў.
Адсутнасць у спісе такіх прадпрыемстваў, паводле яго слоў, не азначае, што «калі з`явіцца інвестар для любога іншага акцыянернага таварыства, гэтыя пытанні разглядацца не будуць».
«Усё будзе вывучацца, і будзе рыхтавацца адпаведнае рашэнне», — падкрэсліў Гаеў.
Ён таксама паведаміў, што ў прыватызацыйны спіс на 2015 год увайшлі 64 гаспадарчыя таварыствы і чатыры рэспубліканскія ўнітарныя прадпрыемствы. «Гэта план для працы, гэта не догма. Па кожным аб'екце работа будзе праводзіцца», — сказаў кіраўнік Дзяржкаммаёмасці.
«Гэты спіс служыць адпраўным пунктам для наступнай працы па пошуку інвестараў. Гэта не выключае работы і па астатніх ААТ.
Калі будзе знойдзены інвестар, які будзе гатовы ўкласці сродкі ў развіццё любога акцыянернага таварыства, гэтыя пытанні заўсёды будуць разглядацца. Гэта не спісы дзеля спісаў, каб потым па іх рабіць справаздачу. Тым больш у апошнія гады былі праблемы з рэалізацыяй такіх планаў», — зазначыў Гаеў.
Паводле яго слоў, калі рэалізаваць планы па новым спісе, то можна атрымаць мінімум 850 млн. долараў. «Але для гэтага трэба прыняць рашэнне, знайсці інвестара, рэалізаваць і атрымаць гэтыя сродкі. Мы будзем працаваць сумесна з іншымі дзяржорганамі», — запэўніў старшыня Дзяржкаммаёмасці.
Разам з тым ён зазначыў, што на сёння ў дзяржуласнасці застаецца вялікая колкасць прадпрыемстваў — больш за 2.300 унітарных і 1.850 ААТ, акцыямі якіх валодае дзяржава, у 73% з іх — кантрольным пакетам.
«Тут мы выкарыстоўваем падыходы кіраўніка дзяржавы. То бок, прыватызацыя носіць кропкавы характар. Прыватызаваць можна любую маёмасць, любое прадпрыемства, але трэба падыходзіць выбіральна з пункту гледжання дзяржавы да прыняцця такога кіраўніцкага рашэння», — сказаў Гаеў.
Каментары