Расійскія бамбардзіроўшчыкі стварылі аварыйную сітуацыю ў небе Ірландыі
Два расійскія бамбардзіроўшчыкі Ту-95, якія ляцелі з адключанымі маячкамі-транспондарамі, наблізіліся так блізка да калідора, у якім лятаюць цывільныя самалёты, што авіядыспетчары ў Дубліне, арыентуючыся па дадзеных з радараў, былі вымушаныя адкласці вылет аднаго пасажырскага лайнера і змяніць маршрут іншага, каб пазбегнуць небяспекі катастрофы, паведаміла агенцтва Bloomberg.
На мінулым тыдні ўрад Ірландыі рассакрэціў інфармацыю пра гэты інцыдэнт, які адбыўся 18 лютага гэтага года, але ён быў толькі адным з апошніх падобных, якія былі звязаныя з рызыкоўнымі паводзінамі расійскіх ваенных самалётаў у еўрапейскім небе.
У снежні выведны самалёт РФ амаль сутыкнуўся з пасажырскім лайнерам кампаніі SAS у раёне паўднёвай Швецыі, паведаміў камандуючы ВПС каралеўства. Раней у 2014 годзе расійскі самалёт таксама празмерна наблізіўся да іншага лайнера, які ўзлятаў з аэрапорта ў Капенгагене. Масква заявіла, што абодвух інцыдэнтаў не было.
Згодна з інфармацыяй НАТА, за 2014 год расійскія ваенныя самалёты набліжаліся і часам парушалі паветраную прастору краін ЭС больш за 100 разоў. У большасці выпадкаў расейцы адключалі свае транспондары — электронныя прылады, якія дазваляюць адсочваць рух паветраных судоў, і якія абавязковыя для выкарыстання ўсімі грамадзянскімі самалётамі.
У выніку стваралася сур'ёзная небяспека для цывільнага паветранага трафіку, заяўляў раней генеральны сакратар НАТА Енс Столтэнберг. З той жа нагоды да Міжнароднай арганізацыі грамадзянскай авіяцыі ААН звярнулася Фінляндыя, якая адчувае небяспеку ад палётаў расійскай ваеннай авіяцыі каля сваіх межаў.
З канца Халоднай вайны дзейнічала нефармальная дамоўленасць, што ваенныя самалёты будуць выкарыстоўваць транспондары, калі будуць набліжацца да грамадзянскіх паветраных калідораў.
Цяпер чытаюць
Што азначае расследаванне Міжнароднага крымінальнага суда для Лукашэнкі і беларусаў? Тлумачыць Кацярына Дзяйкала11
Каментары