Арганізацыі масава адклікаюць свае заяўкі на размеркаванне маладых спецыялістаў, паведаміў рэктар Беларускага дзяржаўнага ўніверсітэта Сяргей Абламейка на прэс-канферэнцыі ў Мінску 24 сакавіка.
«Традыцыйна фірма дасылала ў ВНУ свае заяўкі на спецыялістаў. Мы спрабавалі звесці працадаўцу і студэнта, каб былі задаволеныя і мы, і выпускнікі, — расказаў рэктар. — Сёлета пагалоўна пішуць, што адклікаюць заяўку. Гэта звязана з пагаршэннем эканамічнай сітуацыі ў краіне, шматлікія прадпрыемствы працуюць няпоўны працоўны тыдзень».
Абламейка выказаў меркаванне, што колькасць заявак ад прадпрыемстваў будзе меншая, чым колькасць выпускнікоў, якія падлягаюць размеркаванню. Бюджэтнікі будуць прасіць размеркаванне, а ўніверсітэт павінен будзе яго даць, «і гэта будзе няпроста». Рэктар таксама паведаміў, што выпускнікі платных аддзяленняў у папярэднія гады звярталіся з просьбай даць ім першае месца працы.
«Не так проста выпускніку ВНУ знайсці працу. Хто цябе чакае? Калі выпускнікі будуць шукаць працу самі, знойдуць не ўсе. Вопыт Еўропы такі, што прыблізна палова выпускнікоў ВНУ не працуе пасля заканчэння ўніверсітэта. Не хочацца, каб у нас такое было. Таму размеркаванне — гэта не зло, хутчэй, гэта добра», — адзначыў Абламейка.
Сярод тых, хто крытыкуе інстытут размеркавання, больш за ўсё выпускнікоў інстытута журналістыкі, якія не жадаюць ехаць працаваць у раённыя выданні, сказаў рэктар. «Тым часам правілы гульні вызначаныя з самага пачатку. Людзі, якія не жадаюць працаваць па размеркаванні, могуць вучыцца на платным аддзяленні», — сказаў Абламейка.
Цяпер выпускнік бюджэтнага аддзялення дзённай формы навучання ВНУ адпрацоўвае па размеркаванні два гады, а ССНУ — адзін год.
Пытанне пра змяненне заканадаўча замацаванай нормы ў бок павелічэння ці памяншэння тэрміну адпрацоўкі ў Мінадукацыі не абмяркоўваецца. Размеркаванне — гэта гарантыя давання першага працоўнага месца выпускніку, сказаў 4 сакавіка міністр адукацыі Міхаіл Жураўкоў.
Спявак Дзмітрый Калдун паказаў сваю мінскую кватэру недалёка ад Драздоў ШМАТ ФОТА17
Каментары