Еўрасаюз выдзеліў 5 млн еўра на рэалізацыю праекта «Садзейнічанне пераходу Рэспублікі Беларусь да «зялёнай «эканомікі». Праект рэалізуецца Праграмай развіцця ААН, нацыянальны выканаўца — Міністэрства прыродных рэсурсаў і аховы навакольнага асяроддзя. Пра гэта на прэзентацыі праекта 31 сакавіка паведаміла яго кіраўнік Вольга Чаброўская.
Паводле яе слоў, праект разлічаны на тры гады і ўключае тры асноўныя кампаненты. Першы кампанент уяўляе сабой інфармацыйную кампанію, накіраваную на розныя мэтавыя групы — дарослых, дзяцей і людзей сталага ўзросту. У прыватнасці, у Беларусі плануецца правесці экалагічны форум і круглыя сталы па «зялёнай» эканоміцы, распрацаваць тэматычныя камп'ютарныя гульні і мабільныя праграмы, стварыць электронную «зялёную» карту, на якой будуць адзначаны арганізацыі, што збіраюць і сартуюць адходы на аснове «зялёных» прынцыпаў. Акрамя таго, плануецца закупіць экалагічны транспарт (электрамабілі) у Нацыянальны гісторыка-культурны музей-запаведнік «Нясвіж», а таксама стварыць інфармацыйныя экалагічныя цэнтры ў заказніках «Прыбужскае Палессе» і «Свіцязянскі».
Другі кампанент праекта ўключае рэалізацыю ў рэгіёнах чатырох пілотных праектаў, заснаваных на прынцыпах «зялёнай» эканомікі: арганізацыю вытворчасці офіснай паперы з другасных рэсурсаў у Барысаве (Мінская вобласць) і глыбокай перапрацоўкі сапрапелю — у Жыткавічах (Гомельская вобласць), стварэнне комплексу па перапрацоўцы драўняных адходаў у Брэсце і гадавальніка для вырошчвання птушак цецеруковых парод — у заказніку «Налібоцкі».
Трэці кампанент уключае працу з няўрадавымі арганізацыямі. «У нас вылучана асобная сума сродкаў на гранты грамадскім арганізацыям, якія будуць выдавацца пад «зялёныя» ініцыятывы. Праекты могуць распрацоўвацца сумесна з дзяржаўнымі органамі, бізнес-супольнасцю, але падаваць іх павінны грамадскія арганізацыі», — адзначыла Чаброўская. Інфармацыя пра конкурс праектаў з'явіцца ў бліжэйшыя месяцы.
Цяпер чытаюць
«Я хачу справядлівасці — і для жанчын, і для сябе». Шчырая гутарка з Андрэем Стрыжаком пра скандал з дыкпікамі, залежнасці і будучыню27
Каментары