«Не трэба ўсіх сабак вешаць на Сталіна» — святары аб праваслаўным фэсце на «Лініі Сталіна»
У царквы з «Лініяй Сталіна» склаліся добрыя адносіны, але кананізаваць генералісімуса ў Беларусі не збіраюцца.
Фестываль праваслаўнай моладзі пройдзе 18—19 ліпеня ў комплексе «Лінія Сталіна». Пасля літургіі ў храме ў Заслаўі да «Лініі Сталіна» пойдзе хрэсны ход. На падзею звярнулі ўвагу Naviny.by ды распыталі пра яе праваслаўных святароў.
Прэс-сакратар Мінскага Епархіяльнага ўпраўлення протаіерэй Сяргей Лепін не бачыць супярэчнасцей у мерапрыемстве. Ён называе «Лінію Сталіна» помнікам ахвярам вайны і лічыць вартым стараніцца спроб апраўдання рэжыму Сталіна. «Варта памятаць аб разбурэннях, братазабойчай вайне і нянавісці, што была ў грамадстве пры ім. Але разам з тым, не варта ўсіх сабак вешаць на Сталіна», — кажа ён.
Кіраўнік моладзевага аддзелу Мінскай епархіі і арганізатар фестывалю протадыякан Максім Логвінаў кажа, што месца было абранае праз «добрыя адносіны» праваслаўнай царквы з комплексам. Кананізаваць Сталіна царква не збіраецца, кажа ён. На «Лініі Сталіна» па суседстве з помнікам Сталіну з’явіцца праваслаўная капліца. «Я супраць таго, каб разбураць помнікі. Гэта наша спадчына — якая ёсць, такая ёсць», — кажа ён і прыгадвае разбурэнні «Ісламскай дзяржавай» помнікаў ўзростам у некалькі тысяч год.
Naviny.by адзначаюць, што на фестывалі выступіць гурт «Комба Бакх», лідарам якога ёсць брат протадыякана Логвінава. У рэпертуары гурту ёсць цікавая песня пра праваслаўе ў Паўночнай Карэі (відэа). Сам Максім Логвінаў з’яўляецца кіраўніком спартыўна-гістарычнага клуба, у якім працаваў трэнерам Дзмітрый Паўлічэнка, на той момант кіраўнік спецатраду хуткага рэагавання.
***
Да ахвяр рэпрэсій часоў Сталіна прылічваюцца ў розных крыніцах ад 11 да 39 млн чалавек, у тым ліку больш за мільён расстраляных, больш за 6 млн памерлых ад голаду, больш за 3 млн сасланых у лагеры і турмы. Пад асабістым кантролем Сталіна толькі ў 1937 г. на піку рэпрэсій былі арыштаваныя больш за 31 тыс. «царкоўнікаў і сектантаў», з іх 13,6 тысяч чалавек прысуджаныя да расстрэлу.
Тым часам асобныя расійцы прапануюць кананізаваць Сталіна, праводзяць багаслужэнні з «іконай» Сталіна, а «крэатыўныя» сувеніры з выявай Сталіна прадаюцца і ў Беларусі.
Цяпер чытаюць
Пагражаў вайскоўцам раскрыць, хто з іх гомасэксуал, каб выпытаць сакрэты і прадаць Украіне. Вось за што адыёзны функцыянер БРСМ атрымаў 17 гадоў калоніі2
Каментары