«Nie treba ŭsich sabak viešać na Stalina» — śviatary ab pravasłaŭnym feście na «Linii Stalina»
U carkvy z «Linijaj Stalina» skłalisia dobryja adnosiny, ale kananizavać hienieralisimusa ŭ Biełarusi nie źbirajucca.
Fiestyval pravasłaŭnaj moładzi projdzie 18—19 lipienia ŭ kompleksie «Linija Stalina». Paśla liturhii ŭ chramie ŭ Zasłaŭi da «Linii Stalina» pojdzie chresny chod. Na padzieju źviarnuli ŭvahu Naviny.by dy raspytali pra jaje pravasłaŭnych śviataroŭ.
Pres-sakratar Minskaha Jeparchijalnaha ŭpraŭleńnia protaijerej Siarhiej Lepin nie bačyć supiarečnaściej u mierapryjemstvie. Jon nazyvaje «Liniju Stalina» pomnikam achviaram vajny i ličyć vartym staranicca sprob apraŭdańnia režymu Stalina. «Varta pamiatać ab razbureńniach, bratazabojčaj vajnie i nianaviści, što była ŭ hramadstvie pry im. Ale razam z tym, nie varta ŭsich sabak viešać na Stalina», — kaža jon.
Kiraŭnik moładzievaha adździełu Minskaj jeparchii i arhanizatar fiestyvalu protadyjakan Maksim Łohvinaŭ kaža, što miesca było abranaje praz «dobryja adnosiny» pravasłaŭnaj carkvy z kompleksam. Kananizavać Stalina carkva nie źbirajecca, kaža jon. Na «Linii Stalina» pa susiedstvie z pomnikam Stalinu źjavicca pravasłaŭnaja kaplica. «Ja suprać taho, kab razburać pomniki. Heta naša spadčyna — jakaja jość, takaja jość», — kaža jon i pryhadvaje razbureńni «Isłamskaj dziaržavaj» pomnikaŭ ŭzrostam u niekalki tysiač hod.
Naviny.by adznačajuć, što na fiestyvali vystupić hurt «Komba Bakch», lidaram jakoha jość brat protadyjakana Łohvinava. U repiertuary hurtu jość cikavaja pieśnia pra pravasłaŭje ŭ Paŭnočnaj Karei (videa). Sam Maksim Łohvinaŭ źjaŭlajecca kiraŭnikom spartyŭna-histaryčnaha kłuba, u jakim pracavaŭ trenieram Dźmitryj Paŭličenka, na toj momant kiraŭnik śpiecatradu chutkaha reahavańnia.
***
Da achviar represij časoŭ Stalina pryličvajucca ŭ roznych krynicach ad 11 da 39 młn čałaviek, u tym liku bolš za miljon rasstralanych, bolš za 6 młn pamierłych ad hoładu, bolš za 3 młn sasłanych u łahiery i turmy. Pad asabistym kantrolem Stalina tolki ŭ 1937 h. na piku represij byli aryštavanyja bolš za 31 tys. «carkoŭnikaŭ i siektantaŭ», ź ich 13,6 tysiač čałaviek prysudžanyja da rasstrełu.
Tym časam asobnyja rasijcy prapanujuć kananizavać Stalina, pravodziać bahasłužeńni z «ikonaj» Stalina, a «kreatyŭnyja» suvieniry z vyjavaj Stalina pradajucca i ŭ Biełarusi.
Ciapier čytajuć
«Łukašenka na minimałkach». «Biełaruski kachanak usiaje Rusi» staŭ kumiram žanočaha tyktoka1
«Łukašenka na minimałkach». «Biełaruski kachanak usiaje Rusi» staŭ kumiram žanočaha tyktoka
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii1212
Kamientary